पोशिल्लो सुणो चाबल्यार लुकसाण भरपाय दिवप ही धनयाची जापसालदारकी : सरकाराचे नेम जारी
भांगरभूंय | प्रतिनिधी
पणजी : पोशिल्लो सुणो चाबल्यार ताचो उपचाराचो खर्च तशेंच लुकसाण भरपाय धनयाक दिवची पडटली. पशुसंवर्धन खात्यान हे विशीं नेम जारी केल्यात. ते प्रमाण खात्या कडेन पोशिल्ल्या सुण्यांची नोंदणी करप गरजेचें. तशेंच असल्या सुण्यांचे वागणुके खातीर धनयांक प्रतिज्ञापत्र बरोवन दिवचें पडटलें. तशेंच धनयाचेर भारतीय न्याय संहिता २०२३ प्रमाण कारवाय करतले.
नेमां प्रमाण:
- सुणे वा हेर जनावरां पाळपी धनयांकूच तांची जापसालदारकी घेवची पडटली.
- पोशिल्ल्या जनावरांनी मनीस वा हे जनावरांक कितेंय लुकसाण केल्यार वा तांकां जखमी केल्यार धनयांनी त्या मनशाचो वा जनावराचो वैजकी खर्च करचो पडटलो.
- हे विशीं धनयांनी पशुसंवर्धन खात्याक प्रतिज्ञापत्र बरोवन दिवप गरजेचें. पोशिल्ल्या सुण्याची नोंदणी करतना धनयाचे नांव, पत्तो, सुण्याची जात, पिराय, निर्बीजीकरण केल्यार ताची म्हायती दिवची.
पोशिल्ल्या तशेंच हिंसक जातीच्या सुण्यांक भौशीक सुवातांचेर व्हरतना तांकां चेन वा हेर बारीक गाजली घालप गरजेचें. धनी आपल्या सुण्याक दुसर्या मनशाचेर हल्लो वा हेर त्रास दिवपाक सुचवण्यो दिवपाक शकना. पोशिल्ल्या सुण्याक हेर सुणे वा जनावरां चाबल्यार, ताचे भितर रेबीजचीं लक्षणां दिसपाक लागल्यार खात्याक कळोवप गरजेचें. हे विशीं चुकीची म्हायती मेळ्ळ्यार दंडात्मक कारवाय करतले अशें नेमांनी स्पश्ट केलां.
कांय दिसां आदीं हणजुण्यां पिटबूल सुण्याच्या हल्ल्यांत सात वर्सां पिरायेच्या चल्याक मरण आयिल्लें. उपरांत हिंसक जातीच्या पोशिल्ल्या सुण्यांचो प्रस्न परत मुखार आयिल्लो.उपरांत सरकारान पोशिल्ल्या सुण्याचे वागणुके खातीर धनयांक जापसालदार धरतले अशें स्पश्ट केल्लें. फाटल्या वर्सा ताळगांवां रॉटवायलार सुण्यान दोगा ल्हान भुरग्यांक घास मारिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
