भांगरभूंय | प्रतिनिधी
मुंबय : दर दिसा न्यायालयांत वेगवेगळीं प्रकरणां येतात. पूण कर्नाटक उच्च न्यायालयांत एक अजाप करपा सारकी सुनावणी आयली आनी फुडें कितें करचें हे कोणाकूच सुचना जालें. एके बायलेन १० जाणां कडेन लग्न जावन तांचे कडेन शरिरीक संबंद दवरले. पूण आतां तिणें त्या धाय दादल्यांचेर बलात्काराचो आरोप केला. हें प्रकरण जेन्ना कर्नाटक उच्च न्यायालयांत गेलें तेन्ना न्यायाधीश तिडकले. संबंदीत बायलेची म्हायती राज्यांतल्या सगळ्या पुलीस स्टेशनांनी दिवची आनी हे बायलेची कागळ परत आयल्यार ती घेवची न्हय, अशे निर्देश तांणी राज्याच्या पुलीस महानिरीक्षकांक दिले. ते बायलेचें नांव दीपिका.
न्यायमुर्ती एम नागप्रसन्ना हांणी कर्नाटकांतले हासन जिल्ह्यांतले सकलेशपूरचे कॉफी बागेचे धनी विवेक आनी तांच्या परिवारांतल्या वांगड्यां आड सुरू आशिल्लो खटलो रद्द करपाचे निर्देश दिल्यात. कोडागू जिल्ह्यांतल्या कुशालनगरांत रावपी विवेक आनी दीपिकाची ऑगस्ट २०२२ त एका वेवसायीक कारणाक लागून भेट जाल्ली. उपरांत तांचो संपर्क वाडलो आनी मागीर ताचे रुपांतर मोगांत जालें. उपरांत कांय दिसांनी ८ सप्टेंबर २०२२ दिसा दीपिकान विवेकाच्या आड बलात्काराची कागाळ दिली. कुशलनगर पुलिसांनी हो प्रस्न भितरले भितर सोडोवपाच्यो सुचवण्यो दिल्यो. उपरांत १९ सप्टेंबराक दीपिकान दुसरी कागाळ दिली. विवेकान आपले वांगडा लग्न केलें आनी रोखडेंच सोडिल्ल्याची कागाळ तिणें केली.
न्यायालयांत हें प्रकरण गेल्या उपरांत समजलें, दीपिकान ह्यान पयलीं अश्या णव दादल्यांक फटयलां म्हणून. तशेंच तांचे आड बलात्काराची कागाळूय केल्या. ताका लागून आपल्या आनी कुटुंबीयांच्या आड दाखल केल्ली कागाळ रोखडीच रद्द करपाची मागणी विवेकान न्यायालयाकडेन केली.
मजगतीं, दीपिकान २०११ सावन बलात्कार, छळ, धमकी आनी फटोवपाचे आरोप करून वट्ट १० दादल्यांक फटयल्ल्याचें उक्ताडार आयलां. तातूंत आठ कागाळी ह्या बंगळुरू पुलिशेंत दाखल आशिल्ल्यान एक कागाळ चिक्कबल्लापूर आनी एक मुंबय दाखल आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
