भांगरभूंय | प्रतिनिधी
जयपूर, खबरां संस्था: कॉर्पोरेट क्षेत्रांत काम करपी बायलांक बाळंतपणाची सुटये संबंदी म्हत्वाचो निकाल दिला. बाळंतपण फायदे (दुरुस्ती) कायदो, २०१७ खाला आशिल्ल्या तरतुदी प्रमाण राजस्थान उच्च न्यायालयान सांगलां की, बायलांक खंयच्याय प्रकारच्या कंपनींत म्हणल्यार सरकारी वा खाजगी काम करपी आसूं, १८० दीस बाळंतपण सुटी दिवप सक्तीचें. मिनाक्षी चौधरी विरुद्ध राजस्थान राज्य येरादारी मंडळ ह्या प्रकरणांत न्यायालयान हो निकाल दिला.
कंपनींनी जतनाय घेवची
हे संबंदी गरजेचे आदेश जारी करून मार्गदर्शक तत्वां थारावपाची सुचोवणी न्यायमुर्ती अनुप कुमार धांड हांणी केंद्र सरकारा वांगडाच राजस्थान सरकाराक दिल्या. ल्हान उद्देग तशेंच खाजगी क्षेत्रांतल्या कंपनींनी आपलें धोरण आनी नेम बदलपाची गरज आसा अशें न्यायालयान सांगलें. ह्या बदलां वरवीं अशा कंपन्यांनी काम करपी बायलांक १८० दिसांची बाळंतपण सुटी मेळची हाची खात्री कंपनींनी करची अशें न्यायालयान सांगलां.
ह्या प्रकरणांतली याचिकादार बायल राजस्थान राज्य परिहान म्हामंडळांत काम करता. बायलेक फकत ९० दिसांची सुटी मेळ्ळी. हाचे आड बायलेन उच्च न्यायालयांत याचिका दाखल करून, येरादारी म्हामंडळान सुटयेचो काळ १८० दिसां मेरेन वाडोवचो अशी मागणी केल्ली. पूण नेमांत ९० दिसांची सुटी दिवपाची तरतूद आसा अशें येरादारी म्हामंडळान सांगलें. पूण येरादारी म्हामंडळाची ९० दिसांची सुटी दिवपाची तजवीज भेदभाव करपी आसा असो निकाल न्यायालयान दिवन याचिकादार बायलेक १८० दिसांची सुटी दिवपाचो आदेश दिलो. येरादारी मंडळान ९० दिसांचे सुटये वांगडाच फुडल्या ९० दिसांचो पगार बायलेक दिवचो अशें न्यायालयान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
