भांगरभूंय | प्रतिनिधी
कोलार, खबरां संस्था: कर्नाटकांतल्या कोलार जिल्ह्यांतले एके शाळेंत धक्को दिवपी घडणूक घडल्या. हे शाळेंतल्यान निलंबीत केल्ल्या कला शिक्षकान विद्यार्थिनींचे अश्लील व्हिडिओ शूट केल्यात. पुलिसांनी संबंदीत शिक्षकांच्या मोबायलांतलो डेटा रिकव्हर केल्या उपरांत हो प्रकार उजवाडाक आयला.
कर्नाटकांतले मोरारजी देसाय निवासी शाळेंत हो प्रकार घडलो. मुनियप्पा अशें ह्या शिक्षकाचें नांव. ताच्या मोबायलाचेर सुमार पांच हजारां परस चड बुरशे व्हिडिओ सांपडल्यात. मुनियप्पा सध्या ते शाळेंत ना. ताका डिसेंबर २०२४ त निलंबीत केल्लो.
मुनियप्पाच्या मोबायलांत विद्यार्थिंनींचे व्हिडिओ आशिल्ल्याचो हुस्को पालकांनी उक्तायिल्लो. पालकांनी कांय म्हयन्यां आदीं मुनियप्पा विद्यार्थ्यांचे मोबायल फोनाचेर व्हिडिओ काडटा अशीय कागाळूय केल्ली. उपरांत लोकांच्या कागाळीं प्रमाण शिक्षकाचो फोन फॉरेन्सीक विभागा कडेन धाडिल्लो. डेटा रिकव्हर केले उपरांत फोनांत पांच हजारां परस चड न्यूड व्हिडिओ आशिल्ल्याचें उक्ताडार आयलें. हे विशीं पुलीस आनीक तपास करता.
मजगतीं, २०२३ त समाजकल्याण मंत्री एचसी महादेवप्पा हांणी विभागाचे प्रधान सचिव पी मणिवन्नन हांकां मोरारजी देसाय निवासी शाळेंतली वॉर्डन, मुख्याध्यापक आनी गट-डी कर्मचारी वांगडी कर्मचार्यांक निलंबीत करपाचे आदेश दिल्ले. कारण तांणी विद्यार्थ्यांक शाळेंतल्या घाणयार्या उदकाची टांकी नितळ करपाक लायिल्ली. हातूंत पांच- स विद्यार्थ्यांचो आसपाव आशिल्लो. हीं भुरगीं सातवी आनी णववेक शिकतालीं आनी तीं सगळीं अनुसूचित जातींतलीं आशिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
