भांगरभूंय | प्रतिनिधी
पणजी : राज्यपाल पी एस श्रीधरन पिल्लई हांणी केरळांत गोंयचे लोकसंख्येचेर भाशण केलें. फाटलीं बारा वर्सां भाजपाचे सत्ते खाला वाडपी बेरोजगारी, गुन्यांव, भूंय रुपांतर आनी दोंगर कापणी तशेंच वाडिल्लो भ्रश्टाचार, जुगार, कॅसिनो, शिंदळकी आनी गोंयचे अस्मितायेचेर जावपी परिणामाचेर ते बेगीनूच उलयतले अशी अपेक्षा कॉंग्रेस पक्षान उक्तायल्या.
केरळांत उलयतना गोंयचे क्रिस्तांव लोकसंख्येंत उणाव आनी मुस्लिमांचे लोकसंख्येंत वाड जाल्ले विशीं राज्यपालान केल्ल्या वक्तव्याचेर प्रतिक्रिया उक्तायतना, कॉंग्रेसीन राज्यपालान गोंयकारांक सतावपी मुखेल समस्येचेर उलोवपाची मागणी केली.
भारतीय राज्यघटनेच्या कक्षेंत सरकारी कामकाजांत जें चलता तें पळोवपाचें राज्याचे घटनात्मक मुखेली म्हणून राज्यपालांचे कर्तव्य जावन आसा. राज्यपालान पक्षांतराक परवानगी दिली आनी उपरांत पक्षांतर करप्यां मदल्या एकल्याचो मंत्री म्हणून आसपाव केलो. हाचे वेल्यानूच राज्यपाल निःपक्षपाती नाशिल्ल्याचें स्पश्ट जाता असो दावो कॉंग्रेसीन केला.
राज्यपालान बेकायदेशीर भूंय रुपांतर आनी दोंगर कापणी आड कारवाय करची, अशी कॉंग्रेस पक्षाची मागणी आसा. गोंयांत खून, बलात्कार, खंडणीच्या घडणुकांनी वाड जाल्या. राज्यपालान सरकारा कडल्यान हाचें स्पष्टीकरण मागचें अशें कॉंग्रेसीन म्हणलां.
हळदोण्या बेकायदेशीर जमीन रुपांतरणांत वांटेकार आशिल्ल्या गोंयच्या मुखेल सचिवांचेर राज्यपाल रोखडेच कारवाय करतले, अशी लोकांचो अदमास आशिल्लो. आसगांव घर जमनीभरवण केल्ल्या प्रकरणांत आदल्या डीजीपीचो वांटो आशिल्लो हे विशीं राज्यपाल केन्नाच उलोवंक नात. हणजुण्यां रातभर व्हडल्या आवाजांत संगीत वाजोवपा विरोधांत थळावे आंदोलन करतना राज्यपाल ओगीच रावले. गोंयकारांक भेकडावपी समस्यांचेर राज्यपालान उलोवचें, अशी मागणी कॉंग्रेस पक्षान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
