भांगरभूंय | प्रतिनिधी
पणजीः जीएसटी कावंसिलाचे 54 वे बसके खातीर मुख्यमंत्री डॉ. प्रमोद सावंत सोमारा दिल्ली पावले. पूण मुख्यमंत्र्यांचे दिल्ली भोंवडेक लागून कांय मंत्री अस्वस्थ जाल्यात.
केंद्रीय अर्थमंत्री निर्मला सीतारामण हांचे अध्यक्षते काला जीएसटी कावंसिलाची 54 वी बसका सोमारा दिल्लींत जाली. हे बसकेक मुख्यमंत्री डॉ. सावंत हांणी हाजेरी लावन सीतारामण हांचे कडेन गोंया कडेन संबंदीत प्रस्नांचेर चर्चा लेगीत केली. मुख्यमंत्र्यांची दिल्ली भोंवडी ही जीएसटी कावंसिलाचे बसके खातीर आशिल्ली, पूण चवथी उपरांत मंत्रीमंडळांत फेरबदल करपाचें तशेंच कांय मंत्र्यांची खातीं बदलपाचें भाजपान आदींच थारायलां. ते खातीर कांय मंत्र्यांचें लक्ष दीसभर मुख्यमंत्री कोणाक कोणाक मेळटात हाचेर आशिल्लें. मजगतीं, मंत्रीमंडळांतल्या फेरबदलाचे नदरेन भाजपान सगळ्याच मंत्र्यांचे कामगिरीचो नियाळ फाटल्या कांय दिसांनी घेतला. ते प्रमाण दोन मंत्र्यांक काडून तांचे सुवातेर नव्या दोन आमदारांक संद दिवपाची सध्या निश्चीत जालां. तशेंच कांय मंत्र्यां कडलीं खातीं लेगीत काडून घेतले. चवथ सोंपताच हे विशींचे प्रक्रियेक गती मेळटली. हे फाटभुंयेर, मुख्यमंत्री डॉ. सावंत हं दिल्ली भोंवडेंत केंद्रांतल्या ज्येश्ठ फुडाऱ्यांक मेळटात काय कितें हाचेर राजकी मळाचें लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
