भांगरभूंय | प्रतिनिधी
बांगलादेशा आडचे टॅस्ट माळेंतले पयले मॅची खातीर भारतान आपल्या 16 वांगड्यांच्या पंगडाची घोशणा केली. यश दयाल हाचो पयले खेपे पंगडांत आस्पाव केला. तशेंच विकेटकीपर बॅट्समन ऋषभ पंताचें टॅस्ट पंगडांत पुनरागमन जालां. तशेंच विराट कोहली खूब तेंपा उपरांत टॅस्टींत खेळटना दिसतलो. कोहली आपली निमाणी टॅस्ट माळ वर्साचे सुरवातीक दक्षीण आफ्रिके आड खेळिल्लो. तशेंच इंग्लंडा आड जाल्ले माळेंत तो खेळूंक नाशिल्लो.
पंताक डिसेंबर 2022त मोटार अपघात जाल्लो. तेन्ना सावन तो क्रिकेटी पसून पयस आशिल्लो. ताणें आपली निमाणी टॅस्ट 2022त बांगलादेशा आड खेळिल्लो. मजगतीं, पंतान सध्या चालू आशिल्ले दुलीप ट्रॉफीचे पयले फेरयेंत इंडिया अ आड दुसऱ्या डावांत आक्रमक अर्द शेंकड्याची खेळी केल्ली. तशेंच मॅचींत सात कॅची धरल्यो.
यश दयाल 24 पयले श्रेणीच क्रिकेटींत खेळ्ळा. तातूंत ताणें 28.89चे सरासरीन 76 विकेटी घेतल्यात. यशा खेरीत निवड समितीन आकाश दीप हाची लेगीत निवड केल्या. आकाशान रांचींत इंग्लंडा आड जाल्ले मॅचींत पदार्पण केल्लें. आकाश आनी दयाल हांणी दुलीप ट्रॉफीचे पयले फेरयेंत आपल्या प्रदर्शना वरवीं सगल्यांक प्रभावीत केल्ले.
आकाशान भारत अ वतीन खेळटना दोनूय डावांनी मेळून 115 धांवड्यो दितना 9 विकेटी घेतिल्ल्यो. जाल्यार दयालान भारत ब वतीन खेळटना दुसऱ्या डावांत तीन म्हत्वाच्यो विकेटी घेवन जैतांत म्हत्वाचें योगदान दिल्लें.
श्रेयस अय्यराची निवड करूंक नाशिल्ल्यान कांय क्रिकेट जाणकारांक अजाप दिसलां. फास्ट बॉलर मोहम्मद शमी लेगीत खोटेचे दुखापतींतल्यान ल्हवल्हव बरो जायत आसा, ताका लागून ताची निवड करूंक ना. लोकेश राहुलाचें पुनरागमन जालां. दुखापतीक लागून ताका इंग्लंडा आडची टॅस्ट माळ चुकिल्ली. राहुलान दुलीप ट्रॉफीच्या पयल्या डावांत 37 आनी दुसऱ्या डावांत 57 धांवड्यांची खेळी केल्ली.
इंग्लंडा आडचे माळेंत उत्कृश्ट रितीन पदार्पण करपी सरफराज खान आनी ध्रुव जुरेल हांची लेगीत निवड केल्या. जुरेलान दुलीप ट्रॉफींत उत्कृश्ट रितीन विकेटकिपींग केल्ली. जाल्यार सरफराज खानान दुसऱ्या डावांत भारत अ आड उत्कृश्ट बॅटींग केल्ली.
इंग्लंडा आडचे माळे खातीर निवड जाल्ल्या के एस भरत, देवदत्त पडिक्कल, रजत पाटीदार, वॉशिंग्टन सुंदर आनी मुकेश कुमार हांची हे खेपे निवड करूंक ना.
पयली टॅस्ट 19 सप्टेंबराक चेन्नय जातली, जाल्यार दुसरी मॅच 27 सप्टेंबराक कानपूरांत खेळयतले. टॅस्टी उपरांत भारत आनी बांगलादेशा मदीं तीन मॅचींची टी-20 माळ लेगीत जातली.
भारताचो पंगडः रोहीत शर्मा (मुखेली), यशस्वी जयस्वाल, शुभमन गिल, विराट कोहली, केएल राहुल, सरफराज खान, ऋषभ पंत (विकेटकीपर), ध्रुव जुरेल (विकेटकीपर), आर अश्विन, रवींद्र जाडेजा, अक्षर पटेल, कुलदीप यादव, मोहम्मद सिराज, आकाश दीप, जसप्रीत बुमराह, यश दयाल.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
