भांगरभूंय | प्रतिनिधी
श्रीलंका पंगडान 10 वर्सांनी इंग्लंडांत टॅस्ट मॅच जिखली. ओव्हल टॅस्टींत ताणें इंग्लंडाक 8 विकेटींनी हारयलो. श्रीलंके वतीन पयल्या डावांत अर्द शेंकड्याची खेळी करपी पाथुम निसांकान दुसऱ्या डावांत शेंकडो मारलो. लहिरू कुमारान मॅचींत 6 विकेटी घेतल्यो.
टॉस हारल्या उपरांत पयलीं बॅटींग करपी इंग्लंडान पयल्या डावांत 325 धांवड्यो केल्ल्यो. श्रीलंकेक पयल्या डावांत 263 धांवड्यो करप शक्य जाल्यो. अशे तरेन इंग्लंडा परस तो 62 धांवड्यांनी फाटीं उरलो. इंग्लंडाचो दुसरो डाव 156 धांवड्यांचेर सोंपलो. अशे तरेन श्रीलंकेक जैता खातीर 219 धांवड्यांची मोखी मेळ्ळी. ताणें ती 40.3 ओव्हरींनी फकत 2 विकेटी व्हगडावन मेळयली.
श्रीलंकेन निमाणे खेपे 2014त लिड्स टॅस्टींत इंग्लंडाक हारयिल्लो. त्या वेळार ताणें 1-0 फरकान जैत जोडिल्लें. पूण, हे खेपे श्रीलंके 1-2 फरकान हार घेवची पडली. इंग्लंडान पयली मॅच 5 विकेटींनी जाल्यार दुसरी टॅस्ट 190 धांवड्यांनी जिखिल्ली.
चवथ्या दिसा श्रीलंकेन 1 बाद 94 धांवड्यां वयल्यान मुखार खेळपाक सुरवात केली. निसांकान 53 आनी कुसल मॅण्डिसान 30 धांवड्यां वयल्यान आपलो डाव मुखार व्हेलो. पूण, कांय वेळान मॅण्डीस बाद जालो. ताका गस अॅटकिंसाना तंबूंत धाडलो. ताणें 37 बॉलांनी 39 धांवड्यो केल्यो.
108 धांवड्यांचेर श्रीलंकेन दुसरी विकेट व्हगडायली. हांगाच्यान निसांकान अॅंजेलो मॅथ्यूजा वांगडा मेळून डाव सांबाळ्ळो.मॅथ्यूजान सांबाळून बॅटींग केली. जाल्यार निसांकान 100 परस अदीक स्ट्रायक रेटीन धांवड्यो केल्यो. ताणें 107 बॉलांनी आपलो शेंकडो पुर्ण केलो.
निसांका आनी मॅथ्यूज हांणी तिसरे विकेटी खातीर 111 धांवड्यांची भागिदारी केली. निसांकान नाबाद 127 आनी मॅथ्यूजान नाबाद 32 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
