इलेक्ट्रीक गाडयांचें मोल दोन वर्सां भितर पॅत्राॅलाच्या गाडयां इतलेंच : गडकरी
भांगरभूंय | प्रतिनिधी
नवी दिल्ली, खबरां संस्था : फुडल्या दोन वर्सां भितर इलेक्ट्रीक गाडयांचें मोल पॅत्राॅल- डिझेलाच्या गाडयां इतलेंच आसतलें, अशें केंद्रीय रस्तो येरादारी मंत्री नितीन गडकरी हांणी सांगलें. ऑटोमोटिव्ह कंपोनेंट मॅन्युफॅक्चरर्स असोसिएशन ऑफ इंडियाच्या (एसीएमए) 64 व्या वर्सुकी अधिवेशनांत ते उलयताले. अर्थ मंत्रालयान इलेक्ट्रीक गाडयांक अनुदान दिलें जाल्यार ताचो चड फायदो जातलो. आमी त्या अनुदानाक पुराय आदार दितले,अशेंय तांणी सांगलें.
गडकरी हांणी स्पश्ट केलें की ‘इलेक्ट्रीक गाडयो तयार करपी कंपनींक आतां अनुदानाची गरज पडची ना. कारण तीं निर्माण करपाचो खर्च उणो जावपाचो आसा. गिरायकूय आतां पॅत्राॅल- डीझेल गाडयां बदला इलेक्ट्रीक गाडयांचो पर्याय स्विकारपाक लागल्यात. पोरूं देशभरांतल्या ऑटो मार्केटांत विकपाक आयिल्ल्या वट्ट गाडयां मदीं 6.3 टक्के इलेक्ट्रीक गाडयांचो आस्पाव आशिल्लो. फाटल्या वर्साच्या विक्री परस ही विक्री दुपेटीन आशिल्ली.
गडकरी हांणी म्हणलें, पॅत्राॅल- डीझेल गाडयांच्या हांव विरोधांत ना. पूण इंधनाचेर भारत अवलंबून आसा तें उणें करपाक जाय. फकत इंधना खातीर आमी दर वर्सा 22 लाख कोटी रुपया खर्च करतात. ताचे बदला आमी इलेक्ट्रीक वाहनां आनी इथेनॉल सारकिल्या जैव इंधनाचेर लक्ष केंद्रीत करपाक जाय.
मजगतीं, गडकरी हांणी सीएनजी वापरपा विशीं सांगलें. ‘सीएनजी हो एक बरो पर्याय. भारतांत बाजारांत हाडिल्ली संवसारांतली पयली सीएनजी दुचाकी बजाज सीएनजीची देख दिवन ती फक्त एका रुपयाक एक किलोमीटर चलता. पूण, पॅत्राॅचेर चलपी दुचाकेत एक किमी वचपाक दोन रुपयां परस चड खर्च येता. दुसरे वटेन इथेनॉल होय एक बरो पर्याय. हाचो फायदो शेतकारांकूय जावपाक लागला. जैव इंधन म्हळ्यार इथेनॉलाची वाडट्या प्रमाणांत मागणेक लागून मक्याच्या दरांतय वाड जाल्या,’अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
