भांगरभूंय | प्रतिनिधी
पणजी : फाटल्या आयतारा सांतइस्तेव जुंव्याचेर आखाडो फेरी धक्यार घडिल्ले घडणुकेन पोरणें गोंयच्या पुलिसांक नाका शेवट केलां. बाशुदेव भंडारी चलोवपी रेंट अ कारचो फाटलाव करपी सेडान मोटार पोरणें गोंय पुलिसांच्या एका पंगडान हुबळी वाठारांत लोकेट केली. बेळगांवचे दुबावीत यासिम गौस (32) आनी सलमान ऊर्फ मोहम्मद गौस (28) हांची चवकशी चालू आसा.
शेनवारा, 7 सप्टेंबराक दनपारां बाशुदेव भंडारीचो भाव बलराम भंडारी हांणी पोरणे गोंय पुलीस स्टेशनाचेर नोंद केल्ले कागाळी प्रमाण माशेलांत गाडयेक धपको लागिल्ल्यान एक निळ्या रंगाचे सेडान मोटारीन फाटलाव केल्ल्यान भियेल्ल्या रेंट अ कारींतलो बाशुदेव मेळटा तसो रस्तो काडून आखाड्या वयल्या फेरी धक्यार पावलो. अदमास कळूंक नाशिल्ल्यान तांणी सरळ गाडी न्हंयेंत व्हेली. हातूंत बाशुदेव हाचे वांगडा आशिल्ली चली वाटवली. बाशुदेव मात अजूनय गायब आसा. दर्यादेग पुलीस आनी उजो पालोवपी दळाचे जवान तपास करतात. मजगतीं हे विशीं पोरणें गोंय पुलिसांनी दुबावितां आड गुन्यांव नोंद केला.
हे विशीं पोरणें गोंय पुलिसांनी 4 सोद पंगडांची स्थापना केल्या. पुलिसांनी हुबळी आशिल्ले टोयोटा इटीयोस जीए 07 ई 5395 गाडयेचो सोद घेतला. वांगडा दोगां दुबावितांक ताब्यांत घेतल्यात. हे विशीं पुलीस स्टेशनाचे निरिक्षक सतीश पडवळकार हांच्या मार्गदर्शना खाला पुलीस उपनिरिक्षक एडवीन डायस फुडलो तपास करतात.
गोंयची मोटार, चलताली बेळगांवां
गाडये विशीं मेळिल्ले चड म्हायती प्रमाण, ही गाडी मूळ बेळगांवां रावपी एका मनशान वास्कोच्या एका मनशा कडल्यान कुंकळ्ळीच्यान विकती घेतिल्ली. ती सध्या बेळगांवां वापरताले. ही घडणूक घडली त्या दिसा यासिम गौस (32) आनी सलमान ऊर्फ मोहम्मद गौस (28) हे दोगूय ही गाडी चलयताले. ते पणजे कॅसिनोंत जुगार खेळून रातचे परत बेळगांव वताले. माशेलांत रेंट अ कारचो धपको हे गाडयेक लागिल्लो. उपरांत गाडी न्हंयेंत वचपाची दुर्घटणा घडली. मजगतीं वाटेर बासुदेव आनी यासीम हांचे मदीं वादूय जाल्लो. फुडें फेरी धक्याचेर पावतांच बाशुदेव हांणी अदमास कळूक नाशिल्ल्यान गाडी सरळ न्हंयेंत व्हेल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
