भांगरभूंय | प्रतिनिधी
पणजी : फाटल्या आयतारा सांतइस्तेव जुव्याचेर आखाडो फेरी धक्यार घडिल्ले घडणुकेन पोरणें गोंयच्या पुलिसांक नाका शेवट केलां. बाशुदेव भंडारी चलोवपी रेंट अ कारचो फाटलाव करपी सेडान कार पोरणें गोंय पुलिसांच्या एका पंगडान हुबळे हांगा लोकेट केली. बेळगावचे दुबावीत संशयित यासिम गौस (३२) आनी सलमान ऊर्फ मोहम्मद गौस (२८) हांची चवकशी सुरू आसा.
शेनवारा, ७ सप्टेंबराक दनपरां बाशुदेव भंडारीचो भाव बलराम भंडारी हांणी पोरणे गोंय पुलीस स्टेशनाचेर नोंद केल्ले कागायी प्रमाण माशेलांत गाडयेक धपको लागिल्ल्यान एक निळ्या रंगाची सेडान गाडी फाटलाव केल्ल्यान भियेल्ल्या रेंट अ कारांतलो बाशुदेव मेळटा तसो रस्तो काडून आखाड्यावेल्या फेरी धक्यार पावलो. अदमास कळूंक नाशिल्ल्यान तांणी सरळ गाडी न्हंयेंत व्हेली. हातूंत बाशुदेव हाचे वांगडा आशिल्ली चली वाटवली. बाशुदेव मात आजूनय गायब आसा. दर्यादेग पुलीस आनी उजो पालोवपी दळाचे जवान तपास करतात. मजगतीं हे विशीं पोरणें गोंय पुलिसांनी दुबावितां आड गुन्यांव नोंद केला.
हे विशीं पोरणें गोंय पुलिसांनी ४ सोद पंगडांची स्थापना केल्या. पुलिसांनी हुबळी आशिल्ले टोयोटा इटीयोस जीए ०७ ई ५३९५ गाडयेचो सोद घेतला. वांगडा दोगां दुबावितांक ताब्यांत घेतल्या. हे विशीं पुलीस स्टेशनाचे निरीक्षक सतीश पडवळकार हांच्या मार्गदर्शना खाला पुलीस उपनिरीक्षक ऍडविन डायस फुडलो तपास करतात.
गाडये विशीं मेळिल्ले चड म्हायती प्रमाण, ही गाडी मूळ बेळगांवां रावपी एका मनशान वास्कोच्या एका मनशा कडल्यान कुंकळ्ळी हांगच्यान विकती घेतिल्ली. ती सध्या बेळगांवां वापरताले ही घडणूक घडली त्या दिसा यासिम गौस (३२) आनी सलमान ऊर्फ मोहम्मद गौस (२८) हे दोगूय ही गाडी चलयताले. ते पणजी हांगा कॅसिनोंत जुगार खेळून रातचे परत बेळगांव वताले. माशेलांत रेंट अ कारचो धपको हे गाडयेक लागिल्लो. उपरांत गाडी न्हंयेंत वचपाचो अपघात घडलो. मजगतीं वाटेर बासुदेव आनी यासीम हांचे मदीं वादूय जाल्लो. फुडें फेरी धक्याचेर पावतांच बाशुदेव हांणी अदमास कळूक नाशिल्ल्यान गाडी सरळ न्हंयेंत व्हेल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
