भांगरभूंय | प्रतिनिधी
नवी दिल्ली, खबरां संस्था ः दिल्ली उच्च न्यायालयान विकिपीडियाक सांगलें, आमी तुमचो भारतांतलो वेवसाय बंद करतले. सरकाराक विकिपीडिया बंद करपाक सांगतले. भारत आवडना जाल्यार हांगा काम करचें न्हय.
खरें म्हणल्यार हें प्रकरण विकिपीडिया आड जाल्ल्या बदनामी प्रकरणाक संबंदीत आसा. खबरां एजन्सी एएनआयन जुलय 2024 वर्सा विकिपीडिया आड खटलो दाखल केल्लो. विकिपीडियाचेर तांचें वर्णन केंद्र सरकाराचें प्रचार साधन अशें आसा असो आरोप एएनआय केल्लो. एएनआयन तें विकिपीडियावेल्यान काडून उडोवपाची मागणी करून 2 कोटी रुपयांची लुकसाण भरपाय मागली.
खबरां एजन्सी एएनआय विशीं विकिपीडियाच्या पानाचेर बरयलां, ‘एएनआयचेर सध्याच्या केंद्र सरकारा खातीर प्रचार साधन म्हणून काम करता, फेक न्यूजांचो वेबसायटींच्या व्हडल्या नेटवर्कांतल्यान सामुग्री वांटता आनी फट, चुकीचे अहवाल दिवपाचो आरोप आसा.
विकिपीडिया फावंडेशनान खबरां संस्थेची बदनामी करपा खातीर खोटी आनी बदनामी करपी सामुग्री उजवाडायल्या असो दावो खबरां संघटनेन केला. 20 ऑगस्टाक न्यायालयान विकिपीडियाक एएनआय पेज संपादीत केल्ल्या तीन वांगड्यांची म्हायती दिवपाक सांगिल्लें.
न्यायालया कडल्यान विकिपीडियाक नोटीस जारी
न्यायालयाच्या आदेशाचें पालन करूंक नाशिल्ल्याचो आरोप करून एएनआयन 5 सप्टेंबराक विकिपीडिया आड अवमान याचिका दाखल केल्ली. ह्या अवमान याचिके विशीं उच्च न्यायालयान विकिपीडियाक नोटीस जारी केल्या.
विकिपीडियाचें प्रतिनिधित्व करपी वकिलान भारतांत तांचो युनिट ना अशें सांगलां. देखूनच तांकां हजर रावपाक वेळ लागलो. न्यायाधीश नवीन चावल हांणी ह्या वादाक खर हरकत घेतली. तांणी विकिपीडियाच्या प्रतिनिधीक 25 ऑक्टोबराक न्यायालयांत हजर रावपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
