भांगरभूंय | प्रतिनिधी
नागरी पुरवण खात्याचो आदेश
भांगरभूंय । प्रतिनिधी
पणजीः रेशनकार्ड फक्त सवाय धान्य दुकानांतल्यान धान्य खरेदी खातीर तयार केलां. ते खातीर सगळ्यां सरकारी खातीं आनी म्हामंडळांनी एकादे व्यक्तीचीं वळक वा नाम्याच्या पुराव्या खातीर रेशनकार्ड मागचें न्हय, अशी अधिसुचोवणी नागरी पुरवण खात्याचे संचालक जयंत तारी हांणी काडल्या. खात्यांनी लाबार्थ्यांची वळख वा नाम्याचो पुरावो म्हूण रेशनकार्ड वापरप बंद करचें, अशेंय अधिसुचोवणेंत म्हणलां.
अधिसुचोवणेंत म्हणलां, एकाद्या खात्याच्या नेमांत रेशनकार्डाचो वापर वळख ग्राह्य धरतात जाल्यायर असो नेम रद्द करचो. कांय खात्यांनी सरकारी सेवा वा येवजणेचो लाव दिवचे खातीर रेशनकार्ड मागतात. हे खातीर सवाय धान्य येवजणेचो लाव घेवपाक इत्सूक नाशिल्ले लोक लेगीत रेशनकार्डा खातीर अर्ज करतात. राष्ट्रीय अन्न सुरक्षा कायदो 2013 प्रमाण रेशनकार्ड फक्त सवाय धान्य खरेदी खातीर दिल्लें कागदपत्र आसा. ते भायर केंद्रीय अन्न आनी भौशीक वितरण खात्यान 2015 त काडिल्ल्या एका आदेशा प्रमाण रेशनकार्ड वळख वा नाम्याच्या पुराव्या खातीर वापरपाक मेळना. हे विशीं गोंय सरकारान जून 2015 त एक आदेश काडिल्लो. तातूंत लेगीत अश्योच सुचोवण्यो केल्ल्यो. तरी लेगीत कांय सरकारी खातीं अजून लेगीत रेशनकार्ड मागतात. अशी मागणी तत्काळ बंद करची, अशें अधिसुचोवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
