भांगरभूंय | प्रतिनिधी
भांगरभूंय । प्रतिनिधी
पणजी : विद्यार्थी मारपेट प्रकरणांत पुलीस निरिक्षकाक निलंबीत करपाची मागणी करपी नुस्तेमारी खात्याचे मंत्री नीळकंठ हळर्णकार हांचेर मुख्यमंत्री डॉ. प्रमोद सावंत हांणी समजूत काडपा सयत बडी मारली, अशी म्हायती गोपांनी दिली. मुख्यमंत्र्यान मंत्री हळर्णकार हांचे सयत पुलीस म्हासंचालक अलोक कुमार आनी उत्तर गोंयचे पुलीस अधिक्षक अक्षत कौशल हांचे वांगडा बसका घेतली. हे बसके उपरांत विद्यार्थी मारपेट प्रकरणाच्या तपासाचेर मंत्री हळर्णकार हांणी जाहीरपणान समाधान उक्तायलें.
शिक्षिकां कडल्यान विद्यार्थ्याक मारपेट केल्ल्या प्रकरणांत नीळकंठ हळर्णकार हांणी पुलीस निरिक्षकाक निलंबीत करपाची मागणी केल्ली. मुख्यमंत्री डॉ. सावंत हांणी बडी मारले उपरांत तांकां ही मागणी फाटीं घेवची पडली. न्यायालयांत दुबावीत शिक्षिका सुटच्यो न्हय म्हूण जतनाय घेवपा खातीर पुलिसांनी अटकेक उशीर केलो. तपासाचेर आपूण समाधानी आसा, अशें मंत्री हळर्णकार हांणी बसके उपरांत पत्रकारां कडेन उलयतना सांगलें.
गोंयांत मंत्रीमंडळ फेरबदलाची चर्चा चालू आसा. मंत्र्यांचे कामगिरीची मोलावणी जावन मंत्रीमंडळात फावो ते बदल जातले, अशें मुख्यमंत्री डॉ. सावंत हांणी स्पश्ट केलां. चवथी उपरांत मंत्रीमंडळात फेरबदल जातलो, अशी चर्चा आसा. ज्या मंत्र्यांक काडपा विशीं चर्चा चल्ल्या तातूंत नुस्तेमारी खात्याचे मंत्री नीळकंठ हळर्णकार हांचो आस्पाव आसा. पुलीस निरिक्षकाच्या निलंबनाची मागणी तांचेर शेकपाचीं चिन्नां आसा. हाचे खातीर मुख्यमंत्र्यांनी तांकां शिटकावणी दिल्याची म्हायती गोपांनी दिली. हाका लागून तांकां जाहीरपणान निलंबनाची मागणी फाटीं घेवची पडली.
मारपेट करपी शिक्षिकां जावं येतात बडतर्फ
शिक्षिकां कडल्यान विद्यार्थ्याक मारपेट जावपाची घडणूक ही गंभीर आसा. पुलिसां कडल्यान योग्य दिशेन तपास चल्ला. अशे प्रकार सरकार सोसचें ना. मारपेट करपी शिक्षिकां नोकरेंतल्यान बडतर्फ जावप शक्य आसा. कायद्या प्रमाण कारवाय जातली, अशें मुख्यमंत्री डॉ. प्रमोद सावंत हांणी सांगलें. पुलीस म्हासंचालक तशेंच मंत्री निळकंठ हळर्णकार हांचे कडेन चर्चा करून कारवायेचो नियाळ घेतला, अशेंय तांणी सांगलें.
निलंबनाची मागणी घेतली फाटीं
मारपेट जाल्ल्या विद्यार्थ्याच्या पालकांची आपणे भेट घेतली. कागाळ नोंद करपाक तांणी उशीर केलो. कायद्या प्रमाण पुलिसांनी पयली नोटीस दिली आनी उपरांत अटक केली. पोलिसांचो तपास योग्य तरेन सुरू आसा. शिक्षिकांक बेगीन अटक कित्याक करूंक ना, हाचें कारण पुलिसांनी सांगलें. तपासाचेर हांव समाधानी आसा. पुलीस निरिक्षकाच्या निलंबनाची मागणी आतां आपूण करिना, अशें नुस्तेमारी खात्याचे मंत्री नीळकंठ हळर्णकार हांणी सांगलें.
दुबावीत शिक्षिकांक अटक
चवथी यत्तेंत शिकपी भुरग्याक मारपेट करपी सुजल गावडे (रा. वेरें) आनी कनिषा गडेकार (रा. पीर्ण) ह्या दोनूय शिक्षिकांक कोलवाळ पुलिसांनी अटक केली, तशेंच ह्या प्रकरणांत पुलिसांनी बाल न्याय कायदो कलम 82 आनी गोंय बाल कायदो कलम 8 बदला 8 (2) हीं दोन कलमां जोडलीं. दुबावीत दोनूय शिक्षिकांक पांच दीस पुलीस कोठडेंत दवरपाचो आदेश म्हापशें न्यायालयान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
