भांगरभूंय | प्रतिनिधी
गोविंद गावडे हांची पत्रकार परिशदेंत म्हायती
राया कोरगांवकार हांकां पं. जितेंद्र अभिषेकी पुरस्कार
पणजी: हिंदुस्तानी शास्त्रीय संगितांतले व्हड तपस्वी पंडित जितेंद्र अभिषेकी हांचे यादीक दर वर्सा तरंगिणी प्रतिश्ठान, कला संस्कृती संचालनालय आनी कला अकादमी हांच्या जोड पालवान आयोजीत करतात तो अंदूंचो 18 वो पंडित जितेंद्र अभिषेकी संगीत महोत्सव अंदूं 28 आनी 29 सप्टेंबर दिसा सकाळीं 9.30 ते रातच्या 9.30 ह्या वेळांत कला अकादमीच्या मास्टर दीनानाथ मंगेशकार कला मंदिरांत जातलो.
अंदूंच्या महोत्सवांत विदुशी डॉ. अश्विनी भिडे देशपांडे, पंडित साजन आनी स्वरांश मिश्रा, पंडित पुरबायन चटर्जी, विदुशी शमा भाटे, पं. राजा काळे, पं. रघुनंदन पणशीकार बी 15 कलाकारांच्या गायन, वादन, नृत्याच्या मैफलींचो आस्पाव आसा.
काल (बुधवारा) पत्रकार परिशदेंत कला संस्कृती मंत्री तशेंच कला अकादमीचे अध्यक्ष गोविंद गावडे हांणी तरंगिणी प्रतिश्ठानाचे अध्यक्ष तशेंच नामनेचे गायक शौनक अभिषेकी आनी प्रायोजक पी. एन. एकस्लुसीवचे सचीन तांबे हांचे हाजिरेंत महोत्सवाची कार्यावळ जाहीर केली.
राजस उपाध्ये (व्हायोलीन), एस. आकाश (बासरी), मकरंद हिंगणे, सुधाकर चव्हाण, धनंजय जोशी, श्रीमती जुई धायगुडे, राजन शहा आनी गोंयच्यो विणा मोपकार आनी सिध्दी सुर्लकार (गायन) ह्या कलाकारांचो आस्पाव आसतलो. पं. सुधीर नायक, पं. तुळशीदास नावेलकार, डॉ. सुधांशू कुलकर्णी, डॉ. उदय कुलकर्णी, मयंक बेडेकर, गीत इनामदार, चिन्मय कोल्हटकर, राया कोरगांवकार, रोहिदास परब, दयेश कोसंबे, सुभाष फातर्पेंकार, प्रेमानंद आमोणकार, दत्तराज म्हाळशी, दत्तराज सुर्लकार, प्रसाद गांवस, गोपाळ प्रभू, सुनाद कोरगांवकार हे साथसंगत करतले, जाल्यार डॉ. अजय वैद्य आनी सिद्धी उपाध्ये हांचें सुत्रसंचालन असतलें.
तरंगिणी प्रतिष्ठानचो अंदूंचो पंडित जितेंद्र अभिषेकी पुरस्कार गोंयचे ज्येश्ठ होर्मोनियम वादक राया कोरगांवकार हांकां भेटयतले अशें गोविंद गावडे हांणी जाहीर केलें.
पंडित जितेंद्र अभिषेकी हांणी गुरु-शिश्य परंपरेन खूबशीं दसकां शिश्यांक तालीम दिली. तरंगिणी प्रतिश्ठान स्थापन करून खूबश्या विद्यार्थ्यांक शिश्यवृत्ती तशेंच जाण्ट्यां कलाकारांक अर्थीक आदार दिलो. ह्या प्रतिश्ठानाचे कार्य तांचे पूत शौनक अभिषेकी चलयतात अशें मंत्री गोविंद गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
