भांगरभूंय | प्रतिनिधी
दोन म्हयन्यांनी करतले नवी निविदा जारी
मडगांव, प्रतिनिधी : एसजीपीडीएच्या ठोक नुस्तें मार्केटाचो सांबाळ आनी ताचे वांगडा सोपो कर एकठांय करपा खातीर २४ ऑगस्ट २०२३ दिसा निविदा काडिल्ली. ३० ऑगस्ट २०२४ मेरेन निविदे खातीर बोली करपाची मुजत दिल्ली. मात आतां ही निविदाच रद्द केली. फुडल्या दोन म्हयन्यांच्या काळांत नवी निविदा जारी करतले.
एसजीपीडीएच्या ठोक नुस्तें मार्केटाचो सांबाळ आनी सोपो कर एकठांय करपाचें काम एसजीपीडीएन फकत पत्रा वरवीं ठेकेदार नेमून केल्लें. हातुंतल्यान कांय दिसां पयलीं बाजारांत गाडयो घेवन येवपी चालकांक बाजारा भितर गाडी घेवन येवपाक बंदी घाल्ली. तशेंच विक्रेत्यांनी ठेकेदार चड प्रवेश कर आकारता असो आरोप करीत एसजीपीडीए वांगडी सचिवांची भेट घेतिल्ली. जून म्हयन्यांत एसजीपीडीएचे बसकेंत एसजीपीडीए अध्यक्ष दाजी साळकार हांणी जूनाचे निमाणे मेरेन सोपो कराची निविदा जारी करतले, अशें स्पश्ट केल्लें. ते प्रमाण १ जुलयाक एसजीपीडीएच्या ठोक नुस्तें मार्केटांतल्या सांबाळा सयत महसूल एकठांय करपा खातीर निविदेंत बदल करून ती जारी केल्ली. आदलो ठेकेदार नुस्तें वेवसायांतलो आसचो आनी ताका तीन वर्सांचो अणभव आसचो ह्यो अटी काडून उडयिल्ल्यो. चडांत चड महसूल मेळचे खातीर यत्न करतां अशें साळकार हांणी तेन्ना सांगिल्लें. ते प्रमाण नव्यान सोंपो कर एकठांय करपा खातीर, ठेकेदार नेमणुके खातीर निविदा जारी केल्ली. ताका प्रतिसाद मेळनाशिल्ल्यान एसजीपीडीए ठोक नुस्त्या बाजाराचो सांबाळ आनी येणावळ एकठांय करपाक २४ ऑगस्ट २०२३ ही तारीख काडिल्ली आनी तातूंतच बदल केल्ली ई- निविदा पुरायेन रद्द केली. ८ ऑगस्ट दिसा एसजीपीडीएच्या १०६ वे बसकेंत सगळ्या वांगड्यांच्या मतान ही ई निविदा रदद् करपाचो निर्णय घेतलो.
निविदा परत काडपाची प्रक्रिया सुरू
एसजीपीडीएचे वांगडी सचीव शेख अली अहमद हांणी, सोपो एकठांय करपा खातीर ठेकेदार नेमणुके खातीर फाटल्या वर्सा काडिल्ली ई निविदा पुरायेन रद्द केल्या. ताका लागून निविदा परत फुडल्या दोन म्हयन्यांच्या काळाञत काडटले. उपरांत सुमार एका म्हयन्याचो काळ बोलीदारांक दितले. ताका लागून फडल्या तीन म्हयन्यांच्या काळांत ही निविदा प्रक्रिया पुराय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
