भांगरभूंय | प्रतिनिधी
नगराध्यक्षः फोंडें पालिकेचे खाशेले बसकेंत म्हत्वाचें निर्णय
भांगरभूंय । प्रतिनिधी
फोंडें: फोंडें शारांत घाणयाऱ्या उदकाचेर प्रक्रिया करपी प्रकल्प सुरू करचे खातीर दरेकल्यान कनेक्शन घेवपाची गरज आसा. ते खातीर अर्ज बांदकाम खात्याच्या विभाग 26 त उपलब्ध करून दिल्यात. फुडल्या दोन म्हयन्यांत अर्ज भरले उपरांत प्रकल्प सुरू करतले. ते खातीर दरेका फ्लॅटांत आनी घरांनी रावप्यांनी नळाच्या बिलांतली 35 टक्के रकम भरची पडटली. फोंडें शार नितळ दवरचे खातीर लोकांनी आदार करचो, अशें नगराध्यक्ष आनंद नायक हांणी मागलें.
फोंडें पालिका वाठारांतलो दरेक फ्लॅट तशेंच घर धनयांक सिवरेज पायपलायनीचें कनेक्शन घेवचे खातीर अर्ज भरून दिवचे. पालिका वाठारांतल्या दरेका घराचें सर्वेक्षण करपाचें. तशेंच चवथीच्या बाजारा खातीर येरादारी हेर रस्त्या वयल्यान घुंवडावपाचो निर्णय बुधवारा घेतिल्ले फोडें पालिकेचे बसकेंत घेतलो.
नगराध्यक्ष आनंद नायक हांच्या मार्गदर्शना खाला घेतिल्ले खाशेले बसकेंत मुख्याधिकारी योगीराज गोसावी, पालिका निरिक्षक विशांत नायक, येरादारी पुलीस सहाय्यक उपनिरिक्षक सत्यवान गांवकार आनी नगरसेवक रितेश नायक, विश्वनाथ दळवी आनी हेर नगरसेवक हाजीर आशिल्ले. फोंडें पालिका वाठारांतलें दरेक घराचें आनी इमारतीचें सर्वेक्षण करतले. ताका लागून पालिकेक कराच्या रुपान अदीक महसूल मेळटलो. सध्या चवथी निमतान वयल्या बाजारांतली येरादारी घुंवडायल्या. हे खातीर खरेदी खातीर येवपी लोकांक येरादारीचो त्रास जावचो ना. स्थितीचेर लक्ष दवरचे खातीर पुलीस कर्मचाऱ्यांची विवीध सुवातांचेर नेमणूक केल्या, अशें नगराध्यक्ष आनंद नायक हांणी सांगलें.
कपड्याची पोती वापरचीः मुख्याधिकारी
शारांत खरेदी खातीर येवपी लोकांनी कपड्याचे पोतयेचो वापर करचो. प्लास्टीक पोतयांचो वापर उणो करचे खातीर लोकांनी आदार करपाची गरज आसा. कारण प्लास्टीक पोतयांच्या वापराक लागून गोरवांचे भलायकीचेर परिणाम जाल्लो दिसता. तशेंच व्हाळांनी व्हड प्रमाणांत प्लास्टीक कोयर सांचिल्लो दिसता, अशें मुख्याधिकारी योगीराज गोसावी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
