भांगरभूंय | प्रतिनिधी
मुख्यमंत्रीः सांखळे स्वयंपूर्ण चवथ बाजार, भुरग्यांचो माटोळी बाजार
भांगरभूंय । प्रतिनिधी
दिवचलः विद्यार्थ्यांनी शिक्षणीक गुणपत्ते वांगडाच सामान्य ज्ञान आनी वेव्हार ज्ञान लेगीत आत्मसात करप गरजेचें आसा. ते खातीर विद्यार्थी दशेंतूच वेगवेगळ्या माध्यमांतल्यान ताची सुरवात जावप गरजेची आसा, अशें मुख्यमंत्री डॉ. प्रमोद सावंत हांणी सांगलें.
सांखळे मांडिल्ल्या चवथ बाजाराचें उक्तावण केले उपरांत मुख्यमंत्री उलयताले. ह्या वेळार शिक्षण खात्याचे सचीव प्रसाद लोलयेंकार, संचालक शैलेश झिंगडे तशेंच हेर अधिकारी ह्या वेळार हाजीर आशिल्ले.
राष्ट्रीय कुशळटाय आराखडो खाला विद्यार्थ्यांनी माटोळी, वेगवेगळ्या डिझायनांचे तुवाले तयार करून विकपाक दवरल्यात. मुख्यमंत्री डॉ. सावंत हांणी ह्या स्टॉल्सांक भेट दिली आनी विद्यार्थ्यांचें कवतूक केलें. ह्या वेळार मुख्यमंत्र्यान तांचे कडेन संवाद सादलो आनी तांकां उर्बा दिली.
तुमी कितलेय शिक्षणीक उंचायेर पावले तरी वेव्हारज्ञान जिणेंत म्हत्वाचें आसा. ते खातीर अशे तरेचे उपक्रम निश्चीत तरेन प्रेरणा दिवपी आसा, अशें मुख्यमंत्री डॉ. सावंत हांणी संगलें. दीसभर मांडिल्ल्या माटोळी बाजारांत विद्यार्थ्यांनी वेगवेगळे तरेचे माटोळीचे नग तशेंच हेर वस्तू विकपाक दवरिल्ल्यो. ताका बरो प्रतिसाद मेळ्ळो. कुशळटाय उदरगतीक चालना दिवचे खातीर सरकारा वरवीं वेगवेगळे उपक्रम चालीक लायतात. शिक्षणा वांगडाच विद्यार्थ्यांक लेगीत कुशळटाय उदरगतीचे धडे दिवप ल्हवू ल्हवू सुरू केल्यात. तशेंच फुडल्या नव्या शिक्षणीक धोरणांत लेगीत वेगवेगळ्या उपक्रमांचो आस्पाव केला, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
