म्हापश्यां रस्त्यावेली फोंडकुलां पुरोवपा खातीर हेल्पलायन क्रमांक जाहीर
भांगरभूंय | प्रतिनिधी
समाजीक वावुरपी संजय बर्डे हांचो फुडाकार
म्हापशें, प्रतिनिधी ः म्हापशांतले रस्ते फोंडकुलांनी भरल्यात ताका लागून लोकांक त्रास जाता. चवथीच्या काळांत लोकांक त्रास उणो करपाच्या हेतान समाजीक वावुरपी संजय बर्डे हांणी फुडाकार घेवन म्हापसेकारां खातीर रस्तो हेल्पलायन क्रमांक 8390642378 जाहीर केला. ह्या हेल्पलायनीचेर फोंडकुलांचो फोटो आनी सुवात सांगल्या उपरांत तें स्वताच्या खर्चान फोंडकुल पुरयतलें अशी म्हायती तांणी दिली.
म्हापशांत आयोजीत केल्ले पत्रकार परिशदेंत तांणी हो हेल्पलायन क्रमांक जाहीर केलो. ह्या वेळार सितेश मोरे, विनेश नायक आनी सूरज कांबळी हाजीर आशिल्ले.
लोकांक बरे रस्ते उपलब्ध करुन दिवपाक मुख्यमंत्री आनी सरकाराक अपेस आयलां अशें बर्डे हांणी सांगलें. सरकार पावसाचे निमित दितात. पूण, दर वर्साच गोंयांत बरोच पावस पडटा. सरकार आपल्या इश्टांक रस्त्याचें कंत्राट दिता. ते उण्या दर्जाचे रस्ते बांदतात. हाका लागून रस्त्यांचेर फोंडकुलां पडटात असो आरोप तांणी केलो.
म्हापश्यां मतदारसंघांतल्या आमदारांक लोकांचें त्रास दिसना. हाकाच लागून रस्त्यां वयलीं फोंडकुलां पुरोवपाक हांवें स्वताच्या खर्चान फुडाकार घेतला. ज्या वाठारांनी गणेश विसर्जन जाता त्या वाठारांतल्या रस्त्या वयलीं फोंडकुलां पयलीं पुरयतले. तशेंच लोकांच्या कागाळी प्रमाण फोंडकुला पुरयतले अशेंय बर्डे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
