भांगरभूंय | प्रतिनिधी
नवी दिल्ली, खबरां संस्था ः संवसारांतल्या सगळ्यांत पोरन्या सूर्यग्रहणाचो सोद लागला. ह्या सूर्यग्रहणाची हिंदू धर्माच्या ऋग्वेदांत नोंद आसा. हे सूर्यग्रहण सुमार स हजार वर्सां आदीं जाल्लें. ताचो उल्लेख हिंदू धर्माच्या चार वेदांतल्यान ऋग्वेदांत सांपडला. हो सोद एका भारतीय आनी जपानी संशोधकान लायलो. हजारांनी वर्सां आदीं हे सूर्यग्रहण नोंद जाल्ल्याची म्हायती मेळ्ळी. ऋग्वेदांतलो हो उल्लेख खरो आसा अशें खगोलशास्त्रज्ञांनी सांगलां. ही घडणूक सुमार स हजार वर्सां आदीं जाल्ली अशें मानतात. ऋग्वेदांत जायत्या धर्मीक आनी अवकाश दर्शनांचेय उल्लेख आसात.
ह्यो कथा 1500 ईसवी वर्सा पयलींच्यो आसात अशें मानतात. हेर सगळ्या धर्मिक ग्रंथां प्रमाण आनी पुस्तकांभशेन ऋग्वेदांत पुर्विल्ल्या घडणुकांचो उल्लेख आसा. कांय ग्रंथांनी पुर्विल्ल्या वस्तूंचोय उल्लेख आसा. पूण ऋग्वेद हो सगळ्यांत पोरणो आसा. जांतूत जायते फावटीं वर्नल इक्वीनॉक्सांत (Vernal Equinox- विषुववृत्त ) सूर्य उदेता असो उल्लेख आसा. जंय दनपारां सुर्याचो उजवाड सरळ माथ्यार पडटा.
एके सुवातेर इक्वीनॉक्स ओरियन नखेत्रांत जाता अशें बरयलां. दुसरो प्लेयडीस (Pleiades) नखेत्रांत आसा. ह्या वर्णनाक लागून खगोलशास्त्रज्ञांनी तपास सुरु केलां. धर्तरी सूर्याभोंवतणी घुंवता तशी ती आपल्या अक्षा भोंवतणी तिरपेपणान (rotates obliquely) घुंवता. ह्या काळांतलो वर्नल इक्वीनॉक्स पायसेस नखेत्रांत आसा. हाचो अर्थ ओरियन हें नखेत्राचें नांव इसवी सन 4500 पयलीं आशिल्लें. आनी प्लीयेडस् नखेत्र इ.स. 2230 वर्सा पयलीं आशिल्लो. हे सांकेतिक भाशेचो भारतीय आनी जपानी संशोधकांनी अभ्यास केला. ऋग्वेदांत जायत्या अवकाशीय घडणुकांचो उल्लेख त्यो घडणुको संशोधित जावंक नाशिल्ल्यो तेन्ना बरयल्लो अशें संशोधकांचें मत आसा. ऋग्वेदाची भास चड सांकेतिक आसा. टाटा इन्स्टिट्यूट ऑफ फंडामेंटल रिसर्चचे मयंक वाहिया आनी जपानाच्या नॅशनल ॲस्ट्रॉनॉमिकल ऑब्जर्व्हेटरीचो मित्सुरू सोमा हांणी ताचो अभ्यास केला.
ऋग्वेद काळांत घडिल्ल्या घडणुकांचो उल्लेख…
दोनूय संशोधकांनी ओरियन नखेत्राच्या काळांत वर्नल इक्वीनॉक्सची तारीख सोदून काडपाक सुरवात केली. कारण पुर्विल्लें सूर्यग्रहण हेच तारखेक जाल्लें. हें सगळ्यांत पयलीं नोंद केल्लें लिखित पुराय सूर्यग्रहण अशें मानतात. म्हणल्यार त्या काळांत ऋग्वेदाचे लेखक जिवे आशिल्ले. ही घडणूक तांच्या मुखार घडली म्हणूनच ताणें ताचो उल्लेख केला.
आनीक दोन उल्लेख….
ह्या दोगांय संशोधकांनी केल्ले गणने प्रमाण, हें सगळ्यांत पोरणें इसवी सन पूर्व 22 ऑक्टोबर 4202 ते इसवी सन पूर्व 19 ऑक्टोबर 3811 ह्या काळांत केन्ना तरी घडला आसूं शकता. सिरियांत हाचे पयलीं मातयेचो टॅबलेट सांपडिल्लो. ताचेर सगळ्यांत पोरण्यां सूर्यग्रहणाचो उल्लेख आशिल्लो. ही घडणूक इसवी सन पूर्व 1375 ते 1223 ह्या काळांत जाल्ली अशें म्हण्टात. ते भायर इसवी सन पूर्व 3340 वर्सा आयर्लंडांत सूर्यग्रहणाचें रॉक कार्व्हींग सांपडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
