भांगरभूंय | प्रतिनिधी
बेंगळुरू, खबरां संस्था ः देशांतल्या कांय राज्यांनी पावसाक लागून हुंवाराची परिस्थिती निर्माण जाली. तेच बरोबर डेंग्यूचो आंकडो खूब वाडलो. डेंग्यू दुयेंतींचो वाडटो आंकडो पळोवन कर्नाटक सरकारान डेंग्यू ही म्हामारी (pandemic) म्हूण जाहीर केल्या. आनी ह्या दुयेंसाच्या सगळ्या जातींचो अधिसुचोवणेंत आस्पाव केलो. हें दुयेंस आतां म्हामारी म्हूण जाहीर जाल्ल्यान राज्यांत डेंग्यू संबंदी चड जतनाय घेतात. तशेंच ताचेर उपचार आनी आळाबंदा हाडपा खातीर नवे प्रोटोकॉल जारी केल्यात.
राज्यांत डेंग्यू दुयेंतींचेर बारीक नदर दवरतात. सगल्या खात्यांक डेंग्यूचेर नियंत्रण दवरपाचो आदेश दिला अशें कर्नाटकाचे भलायकी मंत्र्यान सांगलें. हॉस्पिटलांक डेंग्यू दुयेंती खातीर वेवस्था करपाची सुचोवणी दिल्या. तशेंच आशा कामगार आतां दरेक घरांनी वचून लोकांक सुचोवण्यो दितात.
डेंग्यू म्हामारी म्हूण कित्याक जाहीर?
अंदूं जानेवारी ते जुलय मेरेन राज्यांत सात हजारां परस चड डेंग्यू दुयेंती सांपडल्यात. तशेंच वट्ट सात दुयेंतींक मरण आयलां. दिसान दीस डेंग्यूचो धोको वाडत आसा तें पळोवन सरकारान डेंग्यूक म्हामारी म्हणून जाहीर केलां.
डेंग्यू म्हणल्यार कितें?
जळार चाबल्यार डेंग्यू हो दुयेंस जाता. डेंग्यू दुयेंस पातळावपी जराळ निवळ उदकांत वाडटा. जेन्ना ही जळार मनशाक चाबता तेन्ना ताच्या आंगांत डेंग्यू व्हायरस पातळटा. चडशे फावट डेंग्यूचो जोर सप्तकाभितर बरो जाता. पूण कांय प्रकरणांनी ह्या जोराक लागून गंभीर समस्या निर्माण जावंक शकतात. डेंग्यूक लागून कुडींतल्या प्लेटलेट्सांचो आंकडो उणो जाता. पेंशीची संख्या 30 हजारां सकयल देंवली जाल्यार मागीर जिवाक धोको निर्माण जाता. तशेंच डेंग्यूक लागून शॉक सिंड्रोम जावं येता. ह्या दुयेंसांत कुडींतले जायते अवयव अपेशी जावपाचो धोको आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
