डॉ. जयंती नायक हांकां एबीजे व्हीआयपी ग्लोबल पुरस्कार

भांगरभूंय | प्रतिनिधी

पणजी: तामीळनाडूंत वावुरपी एबीजे ग्रूप ऑफ कंपनीज हे आपसेवी संस्थेन, अमुरसुरभी एबीजे फूड बँक आनी एबीजे डायनॅमीक फावंडेशन हांच्या जोड पालवान आयतारा दिसा मडगांवां, गुजराती स्कुलाच्या सभाघरांत वल्डर्स बेस्ट एबीजे व्हीआयपी ग्लोबल 2024 पुरस्कार महोत्सव आयोजीत केल्लो. ह्या महोत्सवांत वेगर्ळयावेगळ्या क्षेत्रांत विशेश योगदान दिल्ल्या मानेस्तांक पुरस्कार भेटयले. साहित्या खातीर आशिल्लो पुरस्कार नामनेची कोंकणी लेखिका डॉ. जयंती नायक हांकां भेटयलो.
तांच्या सांगाताक अर्जून पुरस्कार जैतिवंत फुटब़ॉल खेळगडो तशेंच पद्मश्री ब्रह्मानंद शंखवाळकार, प्रगतशील शेतकार पद्मश्री संजय पाटील, भरतनाट्यम नृत्यागंना दुर्गालक्ष्मी राजन, वैजकी वेवसायीक डॉ. सी. राजन, फोटोग्राफर अरवीद टेंगशे, पत्रकार प्रसाद नागवेंकार, कॅटरर सुनिता गावणेंकार, लोककलाकार ज्ञानेश्वर नायक, गुजराती समाज एज्युकेशनल ट्रस्ट, स्पेशल स्कूल पुरस्कार तशेंच आनिकूय कांय जाणांक पुरस्कार भेटयले. गुजराती स्कुला खातीर आशिल्लो पुरस्कार तांचे चेरमॅन मुकेश सगलांनी हांणी स्विकारलो.
हे कार्यावळीक मुखेल सोयरे म्हूण समाजसेवक आनी स्टेट बँकेचे आदले अधिकारी मारुती अय्यर हाजीर आशिल्ले. तांचे हस्तुकीं मानेस्तांक पुरस्कार भेटयले. पुरस्कार मानेलींनी ह्या वेळार आपलें मनोगत व्यक्त केलें. माचयेर एबीजे फावंडेशनाचे संस्थापक एबीजे सलीम आनी सियीओ डॉ. लक्ष्मीप्रभा ह्यो उपस्थीत आशिल्ल्यो. एबीजे ही एक आपसेवी संस्था आनी हे पुरस्कार भारत तशेंच भारता भायर रावपी भारतीयां खातीर फाटल्या कांय वर्सां सावन भेटयतात.