फुडले खेपे भाजपाची दक्षीण भारतांत एन्ट्रीः मुख्यमंत्री

भांगरभूंय | प्रतिनिधी

पणजी, प्रतिनिधी: भारतीय जनता पक्ष हो फक्त उत्तर भारतांच सत्तेंत आशिल्लो पक्ष म्हणटाले. पुण जी कामगीरी भाजपान दक्षीण भारतांन हे लोकसभा वेचणुकेंक केल्या ताचे वेल्यान येता ते विधानसभा वेचणुकेंत भाजप दक्षीण भारतांत एन्ट्री मारतलो हे खात्रीन सांगपांक शकतां, असो विश्वास मुख्यमंत्री दो. प्रमोद सावंत हांणी उक्तायला.
मिस्ड कॉल मारून भाजपाचो वांगडी जावपाचे भाजप गोंय प्रदेश मुळावे सदस्य 2024 ह्या उपक्रमाची म्हायती दिवपा खातीर भाजपान पणजे पत्रकार परिशद आफयल्ली. हे वेळार मुख्यमंत्री प्रमोद सावंत उलयताले. हे वेळार केंद्रीय मंत्री श्रीपाद नायक, येरादारी मंत्री मावीन गुदिन्हो, महसूल मंत्री बाबूश मोन्सेरात, भाजप प्रदेशाध्यक्ष सदानंद शेट तानावडे आनी हेर पदाधिकारी हजर आशिल्ले.
हे वेळार उलयतांना मुख्यमंत्र्यान सांगलें की ओडीशा सारकिल्ल्या राज्यात आमचें सरकार आयलें हाचो आमका मोठो अभिमान आसा. जाल्यार लोकसभा वेंचणुकेंत केरळ सारकिल्ल्या राज्यात भाजपान आपलो अकांवट उक्तो केलो. तशेच तामिळनाडूंत भाजपान मतदान टक्केवारी वाडयली. फुडले फावट विधानसभा वेंचणुकेंत थंयूय भाजप एन्ट्री करतलो हाची आमका खात्री आसा, असो विश्वास मुख्यमंत्र्यान उक्तायला.
भाजप राष्ट्र प्रथम, पक्ष द्वितिय आनी व्यक्ती र्तीतीय हे त्तवाचेर काम करता. जांका देश सेवा करपाची आसा जाल्यार तांचेनी भाजपांत शामिल जावचे. हे वांगडी पद सबका साथ सबका विकासाखातीर आसा. देखून सगळे जातीचे, धर्माचे आनी पंथाच्या लोकांनी भाजपाची वांगडी जावचे, असो उलो मुख्यमंत्र्यान मारला.
हाव विशेस करून 18 ते 24 वर्सा पिरायेच्या गटातल्या तरणाट्या भुरग्यांक भाजपांत येवपांचे आवाहान करता. 2014 पयलीच्या सरकाराची गती आनी भ्रष्टाचार तांका खबर नासले. देखून 2013 पयलीचे आनी आताचे सरकाराच्या कामगीरीचे तुलना हे भुरग्यांनी करपांची गरज आसा, अशे मुख्यमंत्र्यान सांगले.
पंतप्रधान नरेंद्र मोदी हांणी मिस्ड कॉल मारून सदस्य जावपाचे उलो मारतक 4 वरांभितर 31 लाख भारतीयांनी मिस्ड कॉल दिले. जाल्यार गोंयात सांजे 5 ते राती 8.20 मेरेन 31 हजार लोकांनी मिस्ड कॉल दिल्यात. लोकसंख्यानुसार हेर राज्यांपरस गोंयची संख्या चड आसा, अशे तानावडे हांणी सांगले.
31 हजार लोकांभितल्ले साडे णव हजार लोकांनी वांगडी जावपाची प्रक्रीया पुराय आनी 16 हजार लोकांनी फोर्म उक्ते केले ते फक्त भरपाचे उरल्यात. भाजपान पुराय गोंयात केल्ले जागृताय आनी कार्यशाळेंक लागून हे शक्य जावपांक शकले. भाजप दर स वर्सानी परत वांगडी पदाखातीर सगळी प्रक्रीया नव्यान चालिक लावन येवपी वेचणुकेखातीर फुडे वयता, अशी म्हायती तानावडे हांणी दिली.