भांगरभूंय | प्रतिनिधी
कोलकाता, खबरां संस्थाः अस्तंत बंगाल सरकारान बायलां आनी भुरग्यांचे सुरक्षे खातीर आनी लैंगीक अत्याचार, शोशण आनी बलात्कार ह्यो घडणुको आडावपाक नवे विधेयक मांडलां. ह्या विधेयकाची एक म्हत्वाची तरतूद म्हळ्यार बलात्कार पीडितेक मरण आयले जाल्यार आरोपीक सरळ फासार दितले. बलात्कार आनी शोशणाच्या घडणुकां आड हें विधेयक (Aparajita Woman and Child Bill) हाडलां.
अपराजिता वुमन चाईल्ड बिल
अपराजिता वुमन चाईल्ड बिल अशें ह्या विधेयकाचें (अस्तंत बंगाल गुन्यांव प्रतिबंध कायदो दुरुस्ती विधेयक 2024) नांव आसा. ह्या विधेयकाचेर चर्चा करपा खातीर दोन दिसांचें खाशेलें अधिवेशन आपयलां. फाटल्या म्हयन्यांत 9 तारखेक आर. जी. कार मेडिकल कॉलेज आनी हॉस्पिटलांत बायल दोतोराचेर बलात्कार करून तिचो खून केलो. ह्या घडणूकीचो पुराय देशांत निशेद जालो. ह्या प्रकरणा उपरांत ममता सरकारान कायदे खर करपा खातीर हें नवें विधेयक हाडलां.
विधेयकांतल्यो तरतुदी…
बलात्कार, सामुहीक बलात्कार आरोपींक जन्मठेपेची ख्यास्त दिवची. सैमीक रितीन मरण येय मेरेन ही ख्यास्त तिगून उरतली. तेच प्रमाण बलात्कार पीडितेक मरण आयल्यार आरोपींक फांशी दितले. तशेंच बलात्कार प्रकरणाची चवकशी अहवाल 21 दिसां भितर सादर करचो अशी तरतूद केल्या. 21 दिसां भितर चवकशी पुराय जाली ना जाल्यार चवकशी पुराय करपाची वेळ मर्यादा आनीक 15 दीस वाडोवन मेळटली. ह्या 15 दिसांच्या काळांत जी चवकशी जातली ती पुलीस अधीक्षक आनी ताचेवयल्या अधिकारीच्या फुडारपणा खाला जातली. अश्यो तरतुदी ह्या विधेयकांत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
