भांगरभूंय | प्रतिनिधी
आमदार अपात्रताय प्रकरण
भांगरभूंय । प्रतिनिधी
पणजी : अपात्रताय याचिकेचेर बेगीन सुनावणी घेवन निकाल दिवपाचो आदेश दिवपाची मागणी करपी गिरीश चोडणकार हांची याचिका सर्वोच्च न्यायालयांत सोमारा सुनावणेक आयली. याचिकेंत प्रतिवादी आशिल्ले सभापती रमेश तवडकार हांणी बाजू मांडपाक वेळ मागून घेतला. हाका लागून सुनावणी फुडें धुकल्ली.
गिरीश चोडणकार हांची याचिका न्यायमुर्ती संजीव खन्ना आनी न्यायमुर्ती संजय कुमार हांचे मुखार सुनावणेक आयली. प्रतिवादी आशिल्ल्या सभापतींच्या वकिलान बाजू मांडपाक वेळ मागून घेतलो. गिरीश चोडणकार हांणी 17 सप्टेंबर 2023 ह्या दिसा ही याचिका दाखल केल्ली. वेंचणुके उपरांत सप्टेंबर 2022 त काँग्रेसीच्या 8 आमदारांनी वेगळो गट स्थापन करून भाजपांत प्रवेश केलो. हे घडणुकेक आतां दोन वर्सां पुराय जातलीं. आठ आमदारांचो भाजप प्रवेश घटनेक धरून ना, हाका लागून ते अपात्र थारतात. गिरीश चोडणकार हांणी आठ आमदारां आड सभापती कडेन अपात्रताय याचिका दाखल केल्या. सुनावणी घेवन बेगिनात बेगीन निकाल दिवपाचे आदेश सभापतीक दिवचे अशी मागणी करपी याचिका गिरीश चोडणकार हांणी सर्वोच्च न्यायालयांत दाखल केल्या. गिरीश चोडणकार हांचे याचिके सयत सभापती कडेन अपात्रतायेच्यो तीन याचिका प्रलंबीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
