भांगरभूंय | प्रतिनिधी
पेडणें, प्रतिनिधी: मोरजे सरपंच पदाचेर पवन मोरजे हांची विरोधा विणें निवड जाली. मोरजी पंचायत मंडळ स्थापन जाले उपरांत पंचायत मंडळा वांगडा अलिखीत करार जाल्लो. ते प्रमाण पयले फावट सुरेखा अमित शेटगांवकार हांची निवड जाली. उपरांत मुकेश गडेकर हांची सरपंच पदार निवड जाली. तांणी राजीनामा दिले उपरांत हें पद रितें आशिल्लें.
मोरजे पंचायत कार्यालयांत २ सप्टेंबराक सरपंच पदा खातीर वेंचणूक जाली. ह्या वेळार पंच वांगडी पवन मोरजे हांणी सरपंच पदा खातीर अर्ज दाखल केलो. एकूच अर्ज आयिल्ल्यान ते विरोधा विणें सरपंच पदार वेंचून आयले.
अलिखीत करारा प्रमाण सरपंच मुकेश गडेकार हांणी पदाचो राजिनामो दिल्लो. उपरांत हें पद रितें आशिल्लें. भिवा ठाकूर आनी पंचायत सचीव सचिन धावुस्कार हांच्या मार्गदर्शना खाला ही निवड जाली. मुकेश गडेकार हांणी मोरजे हांच्या गळ्यांत फुलांचो हार घालून तांकां सरपंचाचे कदेलीर बसयलें. ह्या वेळार मोरजे हांचे समर्थक आनी नागरीक व्हडा संख्येन हजर आशिल्ले.
आयज सात पंचांनी म्हजेर विस्वास दाखोवन म्हाका सरपंच पदार बसयलो. णवूय प्रभागांची उदरगत थळावे आमदार जीत आरोलकार आनी सरकाराच्या सहकार्यान करतलों. गांवांतले प्रस्न मोरजे पंचायत मंडळाचे मजतीन सोडयतलों, अशें सरपंच पवन मोरजे हांणी म्हणलें.
ह्या वेळार उपसरपंच सुप्रिया पोके, आदले सरपंच तशेंच आतांचे पंच मुकेश गडेकार, पंच सुरेखा शेटगांवकार, पंच रजनी शिरोडकार ,पंच विलास मोरजे, पंच फटू शेटगांवकार, पंच मंदार पोके आनी हेर हाजीर आशिल्ले. जाल्यार ह्या वेळार पंच वांगडी स्वप्निल सुहास शेटगांवकार हाजीर रावूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
