भांगरभूंय | प्रतिनिधी
ए खाद्या विद्यार्थ्याक गणीत विशयाची भिरांत दिसता, हें आमी न्हयकारपाक शकनात. ताका लागून तो विज्ञान फांटो चुकोवपाक सोदता. मागीर परिक्षा म्हणलें काय ताका वेगळोच भंय दिसता. तो पयस करपाचें काम शिक्षक, पालक ना जाल्यार आमचे भोवमानेस्त प्रधानमंत्री मोदीजी आपले मन की बात कार्यावळी वरवीं करतात. हो भंय पयस करपाक तांची कार्यावळ आयकुपाक जाय. विज्ञान फांट्यांत जे विद्यार्थी वतात, तांकां वैजकी नाजाल्यार अभियांत्रिकी शिकचें आसता, पूण आतां विद्यार्थ्यांक नीट परिक्षा दिवची पडटा. अंदूं तर हे परिक्षेची चर्चा चडूच जाली. सर्वोच्च न्यायालया मेरेन ती पावली. हे परिक्षेक लाखांनी विद्यार्थी खर तयारी करून बसतात आनी आपलें नशीब वैजकी फांट्यांत आजमावतात. हें सगल्यांकूच जमता अशें ना. पूण तुमच्यान खर, कठीण परिक्षा दिनासतना लेगीत विज्ञान फांट्यांत हेर अभ्यासक्रम करपाक मेळटात. ह्या लेखांत तें सांगपाचो यत्न केला. हाचे खातीर सरकारी आयुर्वेदीक दोतोर स्नेहा नायक हांणी आमकां खूब मजत केली.
डाॅ. स्नेहा नायक चोपडेंकार हें पणजेच्या हेडगेवार शाळेचें विद्यार्थिनी. आवय- बापायचें सपन आसलें की ताणें दोतोर जावेचं. हुशार स्नेहान तें खरें करून दाखयलें. तें सरकारी भलायकी केंद्रांत आयुर्वेदीक दोतोर म्हूण काम करता. तें शिकतालें तेन्ना नीट परिक्षेच्या जाग्यार गोंयची प्रवेश परिक्षा आशिल्ली. स्नेहाक भारतीय संस्कृतायेची खूब आवड आशिल्ली. देखून ताणें आयुर्वेदाचें शिक्षण घेतलें. तें शिकपाक संस्कृत भाशा खबर आसपाक जाय. अशें म्हणटात की भारतांत रुजून आयिल्ले प्रत्येक वनस्पतींत वखदी गूण आसता. तें नवे पिळगेक सांगपाचो डाॅ. स्नेहाचो यत्न आसता. लागींच सरकारी शाळा आशिल्ल्यान वेळ मेळत तशें तें थंय वता. वखदी रोपांची बँक करपाचें ताच्या मनांत आसा. हीं वखदां तें फुकट दिवपाक सोदता.
आतां नीट परिक्षा सगल्यांक जमत अशें ना. पूण कांय वेंचीक अभ्यासक्रम अशे आसा की ताका नीट परिक्षा लागना. देखीक कायद्याचो अभ्यास तुमी करपाक शकतात. गोंयांत पणजे आनी मडगांवां दोन कडेन कायदो शिकपाची संद आसा. ताची परिक्षा दिवची पडटा. तुम जर बीएस्सी पदवी शिकप सुरू दवरलें तर नीट परिक्षेचो प्रस्नूच येवचो ना. ते खेरीज बारावे यत्ते उपरांत तुमी बीपीएड करपाक शकतात. फायन आर्ट करूं शकतात. हें सगलें गोंयांतूच पणजे करपाक मेळटा. हातूंत तुमकां अभ्यास करपाक खूब वेळ मेळटलो. गोंयांत शेतीचो अभ्यासक्रम दिवपी खाजगी काॅलेज आशिल्लें, पूण ते सरकारान ताब्यांत घेतिल्ल्यान पोरण्यां गोंयांत तुमी हाचें शिक्षण घेवपाक शकतात. कांपालार तुमकां होमसायन्स इमारत दिसता, थंय तुमी आहार तज्ञ जावपाचें शिक्षण घेवं शकतात. आयज कितें जेवचें, कितें खावचें हाका खूब म्हत्व आयलां. खेळपी, अभिनय करपी आहार तज्ञ नेमून वा तांचो सल्लो घेवन आहार घेतात. हे खेरीज बरेच डिप्लोमा अभ्यासक्रम आसात. पूण, ते खातीर तुमकां गोंयां भायर वच्चें पडटलें. डेन्टीस्ट हेल्पर, एक्स रे हेल्पर, आॅप्टिशियन हेल्पर जावपाक तुमकां नीट परिक्षा दिवपाची गरज ना. ह्या सगल्या कोर्सांक खूब मागणी आसा. आनीक कोर्सांची म्हायती तुमी इंटरनेटा वयल्यान घेवपाक शकतात. फक्त ती संस्था सरकारमान्य आसा, खंयच्या विद्यापीठा कडेन संलंग्न आसा, ताची म्हायती करून घेवची. ते खातीर तुमी 98813 35336 ह्या क्रमांकाचेर फोन करचो.
वतां वतां एक दुख्खाची गजाल सांगची दिसता. हातमाग केंद्रां गोंयांत खूब उणीं आसात. हातमाग वस्त्रां लेगीत वापरप उणें जालां. हाचीं वेगवेगळीं कारणां आसात. बाणावलेचे लेखक, फोटोग्राफर पेंटालिओ फर्नांडीस हांणी आपल्या पुस्तकांत फोटो, मुलाखती वरवीं हातमागा विशीं म्हायती दिल्या. अशा केंद्रा्त काम करून निवृत्त जाल्लो नादोडें गांवचो सोमा गांवस आमकां सोडून गेलो. ताचे तकलेंत हातमागाच्यो जायत्यो कल्पना आसल्यो. लागीं आशिल्ल्यान दनपारच्या वेळार मुद्दाम आमचे शाळेंत येवन दुर्मीळ हातमागाचें म्हत्व भुरग्यांक कळत जाल्यार कितलें बरें जातलें अशें तो सांगतालो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
