भांगरभूंय | प्रतिनिधी
डॉ. चंद्रकांत शेट्ये: दिवचले चवथ बाजाराचें उक्तावण
भांगरभूंय । प्रतिनिधी
दिवचलः शारांतल्या आनी गांवांतल्या बायलांनी विवीध तरांचें रुच्चीक जिन्नस तयार करून स्वयंपूर्ण गोंयची संकल्पना साकारल्या. बायलांनी आत्मनिर्भर जावप गरजेचें आसा. ह्या वाठारांतल्या लोकांनी ह्या बायलांनी तयार केल्ले रुचिचे जिन्नस तशेंच खास चवथी खातीर लागपी मिठाय आनी पदार्थ खरेदी करून तांकां उर्बा दिवची. जे वरवीं खऱ्या अर्थान स्वयंपूर्ण आनी आत्मनिर्भर गोंयचें सपन साकार करप शक्य जातलें. ते खातीर सगळे तरेची मजत करपाक सरकार बांदील आसा, अशें आमदार डॉ. चंद्रकांत शेट्ये हांणी सांगलें.
लायन्स क्लब दिवचल, शिक्षा व्हिजन दिवचल हांच्या आदारान दिवचलेच्या झाट्ये सभाघरांत पांच दिसांच्या चवथ बाजाराचें उक्तावण डॉ. शेट्ये हांचे हस्तुकीं जालें. ह्या वेळार लायन्स क्लबाचे अध्यक्ष डॉ. शेखर साळकार, उद्देजक सिद्धार्थ झाट्ये, विश्वास गांवकार, रंजना वायंगणकार, विजयकुमार नाटेकार, अपर्णा फोगेरी, शुभा दिक्षीत, सुप्रिया नायक हाजीर आशिल्लीं.
डॉ. साळकार हांणी सांगलें, बायलांक आस्पावन घेवन चवथ बाजार आयोजीत करून एके तरेन बायलांचें सक्षमीकरण करपाचें बरें माध्यम आसा. मुख्यमंत्र्यान स्वयंपूर्ण गोंयचो मारिल्लो उलो खऱ्या अर्थान साकार जाता, हें ह्या चवथ बाजारांत दिसता. चवथ बाजारांत सुमार 50 स्टॉल घातल्यात. विवीध महिला गट, बायलांनी एकठांय येवन ह्या बाजारांत खाद्यपदार्थ, कपडे, सजावटीचें सामान, मसालो आनी हेर सामान विकपाक दवरलां, तेंवूय सवाय. फुडले पांच दीस हो बाजार चालू आसतलो. ताचो सगळ्यांनी लाव घेवचो, अशें आयोजकांनी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
