भांगरभूंय | प्रतिनिधी
गणपती पावोवपाची लोकां मुखार समस्या; दोन दिसांनी घेतले निर्णय
भांगरभूंय । प्रतिनिधी
वास्कोः झुआरीनगर आनी हेर वाठारांतलो कोयर पावसाच्या उदका वांगडा व्हांवून सांकवाळेच्या बांदोळें तळ्यांत एकठांय जाला. ताका लागून अंदूं खंय गणपती पावोवपाक व्हड समस्या निर्माण जाल्या. गांवच्या लोकांनी केल्ले विनवणे प्रमाण पर्यवरण मंत्री आलेक्स सिक्वेरा हांणी ताकतिकेन त्या तळ्यांतलो कोय आनी चिखल उस्पुपाचें काम हातांत घेतलां. तरी पूण तळ्यांतलें उदक व्हड प्रमाणार प्रदुशीत जाल्ल्यान त्या तळ्यांत गणपती पावोवचे काय दुसरे कडेन, हे संबंदांतलो निर्णय गांवचे लोक फुडल्या एक- दोन दिसांनी घेतले.
बांदोळें तळ्यांत सांकवाळ आनी वाठारांतले सुमार देड हजार गणपती पावयतात. फाटल्या कितल्याश्याच वर्सांच्यान ह्या तळ्याचो वापर गणपती पावोवपा खातीर करतात. ह्या तळ्यांत गणपती पावयले उपरांत भावीक तळ्यांतलें दक पेल्यांत भरून घरा व्हरतात आनी तीर्थ म्हूण पियेतात. पूण अंदूं भाविकां मुखार व्हड आडमेळ उबीं रावल्या.
पावसाच्या उदका वांगडा व्हड प्रमाणार कोयर येवन तळ्यांत सांचला. ताका लागून तळ्यांतल्या उदकाक खर वास मारता. हो कोयर सांकवाळ पंचायतीच्या सामग्री पुनर्प्राप्ती सुविधा (एमआरएफ) केंद्राचो आशिल्ल्याचो दावो सांकवाळचे पंच तुळशीदास नायक हांणी केला.
एमआरएफ केंद्रा वतीन घराघरांतलो कोयर एकठांय करिनात. ताका लागून लोक आपलो कोयर मेळत थंय उडयतात. तो कायर दर दिसा एकठांय करपा बदला संबंदीत कामगार सप्तकांतल्यान एकदांच कोयर व्हरपाक येता. ताका लागून व्हड प्रमाणांत कोयर ह्या केंद्रांत एकठांय जावपाक लागला. जमा केल्ल्या कोयराचो विलो लावंक नाशिल्ल्यान तो कोयर पावसाच्या उदका वांगडा व्हांवता. असोच तो कोयर व्हांवून बांदोळें तळ्यांत पावला, अशेंय नायक हांणी सांगलें.
ह्या तळ्यांत व्हड प्रमाणार कोयर सांचिल्ल्यान गणपती कशे पावोवचे हो व्हड प्रस्न गांवच्या लोकां मुखार निर्माण जाल्लो. ते खातीर तांणी मंत्री सिक्वेरा हांचे मुखार तो मांडलो. मंत्र्यान संबंदीत खात्याक तो कोयर ताकतिकेन काडपाचे निर्देश दिले. उदकास्रोत खात्याच्या अभियंत्यांनी थंय येवन पळोवणी केली. आतां थंय मशिना वरवीं कोयर आनी चिखल उस्पुपाचें काम सुरू जालां. मात तळ्यांतलें उदक प्रदुशीत जाल्ल्यान त्या उदकाक घाण मारता. हे खातीर गांवच्या लोकां मुखार प्रस्नचिन्न उबें रावलां. प्रदुशीत जाल्ल्या उदकांत गणपती पावोवप आनी ते उपरांत तें उदक तीर्थ म्हूण पियेवप हे गजालीं खातीर लोकांचें मन धजचें ना, अशें नायक हांणी सांगलें.
हो कोयर एमआरएफ केंद्राचोच आसा, असोय दावो पंच मॉर्लिओ कार्व्हालो हांणी केलो. पंचायतीन तो कोयर काडपाची गरज आशिल्ली, पूण पंचायतीन ते कडेन आडनदर केली, अशेंय तांणी सांगलें.
प्रदुशीत उदकांत गणपती कशे पावोवचे असोय प्रस्न आनीक एक पंच निधी नायक हांणी उपस्थीत केला. ह्या तळ्याचें उदक खुबूच प्रदुशीत जालां. ताका लागून गणपती पावोवपाक जो कोण ह्या उदकांत देंवतलो, ताका कांतीचें दुयेंस जावपाक शकता, असो दुबाव समाज वावुरपी फा. बोलमॅक्स परेरा हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
