भांगरभूंय | प्रतिनिधी
हैद्राबाद, खबरां संस्था: न्यायमूर्ती हेमा समितीचो अहवाल मुखार आयले उपरांत फाटल्या १३ दिसां सावन मल्याळम चित्रपट मळार बरोच बोवाळ निर्माण जाला. इंडस्ट्रींतल्या खुबश्या नामनेच्या अभिनेते आनी चित्रपट निर्मात्यांचेर लैंगीक छळाचे आरोप सेगीत जाताले.
मजगतीं, अभिनेत्री सामंथा रुथ प्रभू हांणी इन्स्टाग्रामार एक नोट शेअर करून न्यायमूर्ती हेमा समितीच्या अहवालाक येवकार दिलो.तिणें वुमन इन सिनेमा कलेक्टिव्ह (WCC) च्या यत्नांचीय तोखणाय केली.
तशेंच अभिनेत्रीन तेलंगण सरकाराक तेलुगू चित्रपट उद्देगांतल्या लैंगीक छळाच्या प्रकरणांचो एक समान अहवाल सादर करपाची मागणी केली.
WCC च्या यत्नाची केली तोखणाय
इंस्टाग्रामार एक कथा शेअर करतना सामंथान म्हणलें, ‘आपूण तेलुगू चित्रपट उद्येगांतली बायल हेमा समितीच्या अहवालाक येवकार दितां आनी केरळांत WCC च्या यत्नांची तोखणाय करतां. जाका लागून सध्याचो मार्ग मेकळो जाला.
WCC च्या आदेशा प्रमाण, २०१९ त, तेलगू चित्रपट उद्देगा खातीर, बायलां खातीर एक हॅल्पलायन, एक हॅल्पलायन गटूय (द व्हॉयस ऑफ वुमन) तयार केला.
खुबश्या AMMA वांगड्यांचेर आरोप, असोसिएशन विसर्जीत
१९ ऑगस्टाक न्यायमुर्ती हेमा समितीचो अहवाल मुखार आयले उपरांत, मल्याळम मूव्ही-आर्टिस्ट असोसिएशन (AMMA) चे सरचिटणीस आनी नामनेचे अभिनेते सिद्दिकी हांचे सयत दिग्दर्शक रंजित, मुकेश, मनियानपिला राजू, इदवेला बाबू आनी जयसूर्या हांचेर लैंगीक छळाचे आरोप जाल्यात.
उपरांत, २७ ऑगस्ट २०२४ दिसा, AMMAअध्यक्ष आनी साऊथ सुपरस्टार मोहनलाल हांचे सयत १७ वांगड्यांनी तांच्या पदांचो राजिनामो दिलो. तशेंच मल्याळम मुव्ही आर्टिस्ट असोसिएशन (AMMA) विसर्जीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
