भांगरभूंय | प्रतिनिधी
पणजी : सांतइस्तेव जुंव्या कडल्या आखाडो धक्याचेर आयज रातीं सुमार दोन वरांचेर वेगान आयिल्ली गाडी (रेंट अ कार) सरळ न्हंयेच्या उदकांत गेली. रस्त्याचो अदमास कळूंक नाशिल्ल्यान हो अपघात घडलो. ह्या वेळार गाडयेंत दोग जाणां आशिल्लीं. हातूंत एकटी तरणाटी चली वाटवली जाल्यार तरणाटो बुडलो.
चवकशे वेळार मुखार आयिल्ले म्हायती प्रमाण, बाशुदेव भंडारी हो तरणाटो आपले इश्टीणीक मेळपा खातीर गुजरातच्यान गोंयांत आयिल्लो. ही तरणाटी चली सांखळेच्या मॅनेजमेंट कॉलेजींत शिकता. हीं दोगां रेंट अ कारान भोंवतना सांतइस्तेव पावलीं. ह्या वेळार बरीच रात जाल्ली. फुडें वतना त्या दोगांकय तांचे गाडयेचो निळे गाडयेंतल्यान कोण तरी फाटलाव करता अशें दिसलें. उपरांत तीं दोगांय भियेलीं. बरोच वेळ फाटलाव करप चालूच आशिल्लें. उपरांत बाशुदेव हाणें गुगल मॅपाची मदत घेवन मेळत तशी वाट सोदपाचो यत्न केलो. ते निळे गाडये पसून आपली फाट सोडोवपाचो यत्न करतनाच तीं आखाडो- सांतइस्तेवच्या फेरी धक्याचेर पावलीं. काळखांत फुडल्या रस्त्याचो अदमास येवंक नाशिल्ल्यान वेगान आयिल्ली गाडी सरळ न्हंयेंत गेली. रोखडेंच न्हंयेंतलें उदक गाडयेंत भितर सरपाक लागलें. हो प्रसंग वळखून गाडयेंत आशिल्ले चलयेन गाडयेंतल्यान भायर येवन आपलो जीव वाटायलो. जाल्या बाशुदेव गाडयेंतूच आडकून उरलो आसतलो अशें हे घडणुकें वाटवल्ले चलयेन पोरणें गोंय पुलिसांक चवकशे वेळार सांगलें.
मजगतीं, उजो पालोवपी दळ आनी पुलीस घडणके सुवातेर दाखल जाल्यात. न्हंयेंत गेल्ली गाडी काडपा खातीर नौदळाची मजत घेतल्या. कॅमेर्या वरवीं न्हंयेंतले गाडयेचो सोद घेतलो. ती भायर काडपाचो यत्न सुरू आसा.
गोंयांत रातच्या वेळार फाटलाव करप ही घडणूक पुलिसां खातीर अजापाची आसा. अपघाताचें नेमकें कारण कितें हाचो तपास पोरणें गोंय पुलीस करतात. मजगतीं ह्या वाठारांतले सिसीटीव्ही फुटेजूय तपासतात.
गुगल मॅपा खातीर पर्यटकांचे जायते अपघात ह्यान पयलींय घडल्यात. सांखळे वचपा खातीर गुगल मॅपाचेर रस्तो सोदतना हो रस्तो तांकां पयलीं दिसला आसतलो काय, हाचे विशींय सोद घेवप चालू आसा. कारण अशें कितेंय घडल्यार तांत्रीक नदरेन अश्यो गजाली गंभीर आशिल्ल्याचें मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
