रुबिना फ्रान्सिसाक कांश्या पदक

भांगरभूंय | प्रतिनिधी

रुबिना फ्रान्सिस हिणे पॅरीस पॅरालिम्पिकाच्या तिसऱ्या दिसा भारताक पांचवें पदक मेळोवन दिलें. रुबिनान बायलांचे 10 मिटर अॅर पिस्तूल एसएच1 फायनलींत 211.1 गुणां सयत कांश्या पदक जिखलें.

रुबिनान पात्रताय फेरयेंत सातवी सुवात मेळयिल्ली. पुण, फायनलींत तिणें जबरदस्त कामगिरी केली. अंदूंचे पॅरालिम्पिकांत भारतान नेमबाजींत मेळयिल्लें हें चवथें पदक थारलें.

रुबिना फ्रान्सिसान पयलीं म्हणल्यार शुक्रारा अवनी लेखरा हिणें बायलांचे 10 मिटर अॅर रायफल स्टॅण्डींग एसएस1 सर्तींत भारता खातीर भांगरा पदक जिखिल्लें. जाल्यार ह्याच प्रकारांत मोना अगरवाल हिणें कांश्या पदक मेळयिल्लें. त्याच दिसा मनीष नरवाल हाणें दादल्यांच्या 10 मिटर अॅर पिस्तूल एसएच1 प्रकारांत रुप्या पदक जोडिल्लें.

25 वर्सां पिरायेची रुबिना पात्रताय फेरयेंत पयल्या आठ नेमबाजां परस फाटीं पडिल्ली. पूण, अखेरेक तिणें वेग दवरलो आनी पदकाची सर्त जिखली. तिणें पात्रताय फेरयेंत 556 गुणां सयत सातवी सुवात मेळोवन निमाणे फेरयेंतली सुवात निश्चीत केल्ली. मध्य प्रदेशांतली ही नेमबाज तीन वर्सां पयलीं जाल्ले टोकियो पॅरालिम्पिकाचे पात्रताय फेरयेंत सातवे सुवातेर उरिल्ली आनी निमाणे फेरयेंत लेगीत सातवे सुवातेर उरिल्ली. पूण, पॅरिसांत रुबिनान टोकियोंतलें अपेस फाटीं घालीत कांश्या पदक जिखपाक येस मेळयलें.

————

बॅडमिंटनांत भारताचें पदक निश्चीत

बॅडमिंटन खेळगडो सुकांत कामने हाणें थायलॅण्डाच्या सिरपॉन्ग हाका 21-12 आनी 21-12 अशा फरकांनी हारोवन सेमी फायनलींतली सुवात निश्चीत केली. सुकांता वांगडा सुहासान लेगीत पात्रताय मेळयली. मनदीप कौरान बायलांचे एकोड्या एसएल3तल्या ब गटांतले मॅचींत जैत जोडलें. मनदीप मुखार ऑस्ट्रेलियेच्या सेलीन विनॉटाचें आव्हान आशिल्लें. मनदीपान ही मॅच 21-13, 21-10 आनी 21-17 अशा गेमींनी जिखली.

स्वरूप, अर्शद हारले

पॅरा सायकल खेळगडो अर्शद शेखाक दादल्यांच्या सी1-31000 मिटर टायम ट्रायल पात्रतायेंत 11वे सुवातेर समाधान मानचें पडलें ताका लागून अर्शदाक निमाणे फेरयेंत सुवात मेळूंक ना. अर्शदाक सर्त पुर्ण करपाक 1.02.377 मिनटां लागलीं.

मजगतीं, 10 मिटर अॅर रायफल स्टॅण्डींग एसएच1 पात्रताय फेरयेंत वांटेकार जाल्ल्या स्वरुप महावीर उन्हाळकर हाका निमाणे फेरयेंत सुवात मेळूंक ना. पात्रताय फेरयेंत तो 613.4 गुणां सयत 14वे सुवातेर उरलो.