क्रिकेट स्टेडियम दिवचलेच जावचें

भांगरभूंय | प्रतिनिधी

खासदार सदानंद शेट तानावडेः दिवचले सीसीटीव्ही कॅमेरे चालीक

भांगरभूंय । प्रतिनिधी

दिवचलः दिवचले दर्जेदार उदरगतीचे प्रकल्प येवचे, हे खेतीर केंद्र आनी राज्य सरकारा वतीन सगळे तरेची मजत मेळटा. दिवचलेच्या वन गांवांत व्हड क्रिकेट स्टेडियम जावेचं, अशी आपली इत्सा आसा. तशेंच खासदार निधींतल्यान खूबशे म्हत्वकांक्षी प्रकल्प उबारचे खातीर आपलो आदार आसा. दिवचले भलायकी केंद्रांत मड्यां कूड बांदतले, अशी घोशणा राज्यसभा खासदार सदानंद शेट तानावडे हांणी केली.

राज्यसभा खासदार निधींतल्यान विनय तेंडुलकार हांचे कारकिर्दींत मंजूर जाल्ल्या सीसीटीव्ही कॅमेऱ्यांचे दिवचले लोकार्पण जालें. हे कार्यावळींत तानावडे उलयताले.

पालिका कार्यालयांत आयोजीत केल्ले हे कार्यावळीक आदले राज्यसभा खासदार विनय तेंडुलकार, जिल्होधिकारी डॉ. स्नेहा गिते, आमदार डॉ. चंद्रकांत शेट्ये, नगराध्यक्ष कुंदन फळारी, उपनगराध्यक्ष दीपा पळ, नगरसेवक  दिपा शिरगांवकार, अनिकेत चणेकार, विजयकुमार नाटेकार, रियाज बेग, अपर्णा फोगेरी, सतीश गांवकार, निलेश टोपले, सुखदा तेली, गुंजन कोरगांवकार, तनुजा गांवकार, सुदन गोवेकार, रंजना वायंगणकार, मुख्याधिकारी सचीन देसाय, वल्लभ साळकार हाजीर आशिल्ले.

निधीचो उपेग विधायक कामा खातिरूच वापरात. फक्त दर वर्सा गटार येवजण चालीक लावप ही उदरगत न्हय, जाल्यार दर्जेकार उत्पन्न दिवपी, लोकांक अपेक्षीत आशिल्ले प्रकल्प हातांत घेवचे, असो उलो तानावडे हांणी मारलो.

विनय तेंडुलकार हांणी सांगलें, शारांतली गरज वळखून आपले कारकिर्दींत खूबशे प्रकल्प दिले. तातूंतल्यो कांय येवजण्यो फुडल्या काळांत चालीक लागतल्यो.

आमदार डॉ. चंद्रकांत शेट्ये हांणी सांगलें, दिवचल मतदारसंघांत खूबशीं कामां चालीक लायतना लोकांचो वांटो, आदार अपेक्षीत आसा. दिवचल शारांत सीसीटीव्ही कॅमेरे बसयिल्ल्यान खूबशे बाबतींत व्हड सुविधा मेळटली. फुडारांत खूबश्यो येवजण्यो चालीक लागतल्यो, अशेंय तांणी सांगलें.

खासदार निधींतल्यान बरे प्रकल्प हातांत घेतात, ताचो योग्य फायदो लोकांक जाता. ह्या कामांत सगळे तरेची मजत करपाची हमी स्नेहा गिते हांणी दिली.

ह्या वेळार शारांत 45 सुवातांचेर बसयल्ल्या सीसीटीव्ही कॅमेऱ्यांचें लोकार्पण केलें.

पालिके खातीर खासदार निधींतल्यान खूबश्यो येवजण्यो मंजूर जाल्ल्यान नगराध्यक्ष कुंदन फळारी हांणी समाधान उक्तायलें.

विजयकुमार नाटेकार हांणी सुत्रसंचालन केलें.

टिकेक भीक घालिनाः डॉ. चंद्रकांत शेट्ये

राजकारण हो आपले धंदो न्हय. एक दोतोर म्हूण आपूण खूब समाधानी आसा. लोकांची प्रामाणीकपणान सेवा करपाक आपल्याक खोस मेळटा. उदरगती खातीर आपूण मात सुसेद घेनासना वावुरता. बरे प्रकल्प येवचे, लोकांक सुविधा मेळच्यो, हो प्रामाणीक हेतू दवरून आमचो वावर चल्ला. कांय जाण दर गजालींत आमदाराचेर टिका करून आगळें सूख मानतात. मात आपल्याक ताची पर्वा ना. लोक हे सर्वश्रेश्ठ. लोकांची सेवा करपाक आपल्याक खोस मेळटा. विरोधकांनी एक तरी आरोप सिद्ध करून दाखोवचो, आपूण राजकारण सोडटा, अश्या खर उतरांनी आमदार डॉ. चंद्रकांत शेट्ये हांणी टिका करप्यांक जाप दिली.