भांगरभूंय | प्रतिनिधी
पेडणेंः सुकाळवाडो-कोरगांवां काल शुक्रारा सांजवेळा 7.45 वरांचेर दुचाकीवेल्यान आयिल्ल्या दोग जाणांनी एका घराच्या गॅलरींत खेळत आशिल्ल्या दोन वर्सां पिरायेच्या भुरग्याचें अपहरण करपाचो यत्न केलो. ह्या प्रकरणांत मास्टरमायंड आयआरबी पुलीस कॉन्स्टेबल निकेश च्यारी (कोरगांव) आनी ताचो वांगडी वेंगुर्लेंचो जीवरक्षक संजय नार्वेंकार हांकां पेडणें पुलिसांनी अटक केली. भुरग्याचें अपहरण करून खंडणी मागपाची असो तांचो प्लॅन आशिल्लो. मेळिल्ले म्हायती प्रमाण अपहरण केल्ल्या भुरग्याचो बापूय आयआरबी पुलीस आसा. मजगतीं, आदल्या दुस्मानकायेक लागून हो प्रकार घडलां आसूं येता असो अदमास आसा.
थळाव्या लोकांच्या सादूरपणाक लागून हो अपहरणाचो यत्न अपेशी थारलो. दोगां मदल्या एकल्याक थळाव्या लोकांनी धरून पुलिसांच्या ताब्यांत दिलो. मजगतीं, मेळिल्लो तरणाटो पळून वचूंक जायना म्हणून ताका दोरयेन बांदून दवरलो आनी पेडणें पुलिसांक कळयलें. पुलिसांनी थंय वचून दुबाविताक ताब्यांत घेतलो. घडणुकेचो पंचनामो करपाचे काम पुलिसांनी सुरू केलें. दुचाकीवेल्यान पळून गेल्ल्या दुसऱ्या तरणाट्याचो सोद चालू आशिल्लो. चवकशी वेळार पुलिसांनी ताका विचारलें तेन्ना सगळो प्रकार उक्तो जालो आनी तो दुबावीत सांपडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
