भांगरभूंय | प्रतिनिधी
अनुदान, आधारभूत दर वाडोवपाची गरज
मडगांव, प्रतिनिधी ः शेतकी मळार उदरगत जायत आसा. कामगारांचो प्रस्न कायम उरला. शेतकारांक मेळपी अनुदान वाडोवपाची गरज आसा. ते भायर पिकांचें आधारभूत दर वाडोवपाची गरज आसा. अनुदान आनी आधारभूत दर वेळार मेळपाची गरज आसा. लुकसाण भरपाय वेळार मेळ्ळी जाल्यारूच शेतकारांक उर्बा मेळटली नाजाल्यार ते शेतकी मळांतल्यान पयस वतले अशें मत आमदार आलेक्स रेजिनाल्ड हांणी उक्तायलें.
मडगांवच्या रवींद्र भवनांत जाल्ले कार्यावळी उपरांत प्रसार माध्यमां कडेन उलयतना आमदार रेजिनाल्ड हांणी सांगलें, शेतकारांच्यो समस्या सोडोवपा खातीर शेतकी खात्यान हे चौकटी भायर वचपाची गरज आसा. शेतकारांक फायदो जावपाची गरज आसा. हे खातीर शेतकी खात्या कडल्यान यत्न सुरू आसात. शेतकार आपले खिशातले पयशे शेतवडीचेर खर्च करतात, मागीर लुकसाण जाले जाल्यार तांकां दुख्ख जाता. देखूनच वेळार लुकसाण भरपाय मेळ्ळी जाल्यार तांकां सुटका मेळटली, उसरां मेळ्ळी जाल्यार ताचो कांयच फायदो ना. शेतकारांक शेत करपाक जायना अशें दिसचें न्हय म्हणून काम वेळार तांकां मजत करपाची गरज आसा.
सेंद्रीय शेतीं करपाक जायत्यो अडचणी : रेजिनाल्ड
सेंद्रीय शेती शेतकारांक अर्थीक नदरेन फायद्याची ना. सेंद्रीय शेती केल्ल्यार राज्यांतली शेती तिगून उरची ना. सेंद्रीय शेतींतल्यान जावपी लुकसाण खूब व्हड आसा. शेतवडीखातीर गरजेचे कामगार मेळना. गरजेची शेतकी यंत्रणा वेळार मेळना आनी हेर गरजेची मजत मेळना. देखून सेंद्रीय शेतींतल्यान फायदो मेळपाची शक्यताय उणी आसता. हाचेर वस्तुनिश्ठपणान विचार करपाची गरज आसा. तशेंच शेतींतल्या शेतकऱ्यांक चडांत चड फायदो मेळोवपा खातीर यत्न करचे पडटले अशें आमदार रेजिनाल्ड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
