भांगरभूंय | प्रतिनिधी
पणजी ः देशांत आत्महत्या करपाचे प्रमाण बरेच वाडटा. तेच प्रमाण फाटल्या कांय वर्सांत ल्हानश्या गोंय राज्यांत लेगीत आत्महत्या करप्यांचो आंकडो बरोच वाडलां. आत्महत्या करपाक वेगवेगळी कारणां आसात. जायत्या जाणांक समस्यांचेर उपाय काडपा बदला वा त्यो सुटाव्यो करपा बदला जिवीत सोंपोवन उडप सोंपें दिसपाक लागला. देखूनच लेगीत आत्महत्या करप्यांचो आंकडो वाडटा.
दोन दीस आदीं दवर्ले- मडगांवच्या एका वरिश्ठ वकिलान पुलिसांच्या त्रासाक बेजारुन आपल्या घरांत आत्महत्या केल्ली. काल 30 ऑगस्टाक नगरगांव सत्तरीच्या होमगार्डान वेळूस हांगाच्या पुला वयल्यान न्हंयेंत उडी मारली. जाल्यार आयज एका अनवळखी मनशान गांजे- आंबेशी पुला वयल्यान म्हादय न्हंयेंत उडी मारली.
मेळिल्ले आंकडेवारी प्रमाण, फाटल्या वर्सा 2023 त गोंयांत वट्ट 333 जाणांनी आत्महत्या केल्ली. 2022 वर्सा 304 जाणांनी आत्महत्या केल्ली. जाल्यार 2021 वर्सा 319 जाणांनी आत्महत्या केली. धक्को दिवपी गजाल म्हळ्यार अंदूं जून मेरेन म्हळ्यार फकत 6 म्हयन्यांत 125 जाणांनी आत्महत्या केल्ल्याची म्हायती मेळ्ळ्या. पुलिसांचे आंकडेवारी प्रमाण राज्यांत दर दुसऱ्या दिसा सरासरी एक मनीस आत्महत्या करता. गोंयांत फाटल्या 8.5 वर्सांत उण्यांत 2500 जाणांनी आत्महत्या केल्या.
अर्थीक समस्या, गंभीर दुयेंस, कुटुंबीक वाद, कामाचो ताण, दुबळी मानसिकताय हीं आत्महत्या करप्यांचो आंकडो वाडपाचीं मुखेल कारणां आशिल्ल्याचे दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
