भांगरभूंय | प्रतिनिधी
गोंयांत पडिल्ल्या पावसाक लागून धरणां उपाट भरलीं. न्हंय, व्हाळांक हुवार आयले. पयल्याच पावसांत इबाडिल्ले रस्ते उपरांतच्या पावसांत पुराय व्हांवन गेले. ‘सर आली धावून, रस्ते गेले वाहून’ हे कवितेंतले ओळी सारकी स्थिती आयज सगले कडेन पळोवपाक मेळटा.
गोंयांत दरवर्सा सादारण सवायशें -देडशे इंचाच्या आसपास पावस पडटाच. पूण रस्ते व्हावन वचपाचें प्रमाण अंदूं चडूच वाडलां. स्मार्ट सिटीच्या नांवा खाला राजधानी पणजेची जी दैना जाल्या, ती पळोवपाक जायना. पणजेंतले सोंशीक नागरीक आनी बिळांत लिपून बशिल्ले नगरसेवक हांचो खरें म्हणल्यार जाहीर सत्कार करपाक जाय. पणजेची दैना जावपाक सल्लागार आनी काॅण्ट्रेक्टर जापसालदार आशिल्ल्याचें म्हापौर आनी आमदार ह्या दोगांयनी जायते फावटीं सांगलां. भौशीक बांदकाम खातें सुदिन ढवळीकार हांचे कडेन आशिल्लें, तेन्ना ते चड कार्यक्षम आशिल्लें असो घरचो आहेर मंत्री बाबुश मोन्सेरात हांणी खुद्द मुख्यमंत्र्यांक दिला. मुख्यमंत्र्यान हाचेर कांयच स्पश्टीकरण दिनासतना इबाडिल्ल्या रस्त्यांची जापसालदारकी अभियंत्यांचेर धुकलून मेकळे जाले.
फोंडकुलांनी भरिल्ल्या पणजेंत 230 सीसीटीव्ही कॅमेरे बसयल्यात. दरेका कॅमेऱ्याचें मोल 1 कोटी रुपया आसा. हें आयकून पणजेकार आनीक कोमांत गेल्ले. रस्त्यांच्या कामांत पसून व्हडलो भ्रश्टाचार जाला. म्हयन्यां पयलीं रस्त्याचेर घाल्लें डांबर, माती विरघळची तशें व्हांवन गेलां. हें हात मारप वाडतूच चल्लां. पयलीं जनाची नाच जाल्यार निदान मनाची तरी लज बाळगुपाची अशें म्हणटाले. आयज तर कसलीच लज उरिल्ली ना. ताका लागून भ्रश्टाचार गोंयांत सगल्याच मळांचर वाडत आसा. ताका कोण आनी कसो आडायतले?
‘भ्रश्टाचार आतां पयली परस खूब वाडला. ताका दावें घालपी कोण उरूंक ना. तो सोंपोवपाक जाय जाल्यार हो देश शोशण करपा खातीर नासून सेवा करपा खातीर आसा, हाची जाणीव भ्रश्ट व्यक्तींक जावपाक जाय. तशी सुबुद्धी तांकां येवची पडटली. ह्या भ्रश्टांक नैतिकतेचें धडे दिवप गरजेचें. भ्रश्टाचारा पसून मुक्त आशिल्ल्यांची ही जापसालदारकी आसा.’ – महात्मा गांधी, द हिंदू, 27 जानेवारी 1948.
हत्या जावचे पयलीं फक्त तीन दीस पयलीं महात्मा गांधीजीन जें बरयिल्लें तें आतां पाऊणशें वर्सां उपरांत पसून लागू पडटा.
– गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
