भांगरभूंय | प्रतिनिधी
पॅरीस पॅरालिम्पिकांत भारतान काल चार पदकां जिखलीं. नेमबाज अवनी लेखरा हिणें बायलांच्या 10 मिटर अॅर रायफल स्टॅण्डींग एसएच 1 प्रकारांत भांगरा पदक जिखलें. ह्याच प्रकारांत मोना अगरवालान कांश्या पदक मेळयलें.
तशेंच दादल्यांच्या 10 मिटर अॅर पिस्तूल नेमबाजी प्रकारांत मनीष नरवालान रुप्या पदक जिखलें जाल्यार बायलांच्या 100 मिटर टी-35 श्रेणींत प्रिती पालान कांश्या पदक जिखलें.
मजगतीं, अवनीन सेगीत दुसरे पॅरालिम्पिकांत भांगरा पदक जिखलें. टोकियोंत जाल्ले पॅरालिम्पिकांत तिणें भांगरा पदक जिखिल्लें. अशे तरेन पॅरालिम्पिकांत दोन भांगरा पदकां जिखपी ती भारताची पयली खेळगडी थारली.
तिणें निमाणे फेरयेचे सुरवाती सावन आपली पकड घट्ट केल्ली. तिणें 249.7 गूण मेळयत भांगरा पदक जिखलें. रुप्या पदक कोरियाचे युन्री ली जिखलें. तिणें 246.8 गूण मेळयले. तशेंच मोनान 228.7 गुणां सयत तिसरी सुवात मेळयली.
अवनी आनी मोना हांकां आनीक पदकां जिखपाची संद आसा. दोगांय मिश्र 10 मिटर अॅर रायफल प्रोन एसएच 1 आनी बायलांच्या 50 मिटर रायफल 3 पोझीशन्स एसचए 1 प्रकारांत लेगीत वांटो घेतली.
दादल्यांच्या 10 मिटर अॅर पिस्तूलाच्या एसएच 1 श्रेणींत मनीष हाणें रुप्या पदक जिखलें. ताणें निमाणे फेरयेंत 234.9 गुणां सयत दुसरी सुवात मेळयली. कोरियाच्या जियोन्ग्डू जो हाणें 237.4 गुणां सयत भांगरा पदक जिखलें. संवसारीक आनी पॅरालिम्पिकाचो विक्रम करपी चीनाच्या चाओ यांग हाणें 214.3 गुणां सयत तिसरी सुवात मेळयली. टोकियोंत ताणें भांगरा पदक जिखिल्लें. 241.8 गुणांचो संवसारीक विक्रम ताच्याच नांवार आसा.
बायलांचे 100 मिटर टी-35 श्रेणींतले रेसींत प्रिती पालाक तिसरी सुवात फावो जाली. तिणें 14.21 सेकंदांनी सर्त पुर्ण केली. भांगरा पदक आनी रुप्या पदक चीनाचे जिआ झोऊ आनि किआन गुओ हांणी वळेरेन जिखलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
