भांगरभूंय | प्रतिनिधी
मडगांवः दक्षीण गोंय जिल्हो पंचायत अध्यक्ष पदा खातीर शुक्रारा संजना संजय वेळीप हांचो एकूच उमेदवारी अर्ज दाखल जालो. ते खातीर संजना वेळीप हांचें नांव अध्यक्षपदा खातीर निश्चीत जालां.
दक्षीण गोंय जिल्हो पंचायत अध्यक्षपदा खातीर 2 सप्टेंबराक वेंचणूक जातली. हे खातीर शुक्रारा वेंचणुकेची प्रक्रिया सुरू जाली. गिर्दोळे जिल्हो पंचायत मतदारसंघाची वांगडी संजना संजय वेळीप हांणी शुक्रारा सकाळीं आपलो अर्ज सादर केलो. अर्ज भरपाच्या काळांत आनीक एकूय अर्ज आयलो ना. देखून संजना वेळीप हांची विरोधा विणें निवड जातली हें निश्चीत. वेंचणुकेचे पद्दती प्रमाण मतदानाची तारीख 2 सप्टेंबर आशिल्ल्यान त्याच दिसा अधिकृत घोशणा जातली. दक्षीण गोंय जिल्हो पंचायतीचे मुखेल कार्यकारी अधिकारी गौरीश शंखवाळकार हे वेंचणुके खातीर वेंचणूक अधिकारी म्हूण वावुरले. मजगतीं, दक्षीण गोंय जिल्हो पंचायतीचे अध्यक्षपदा खातीर संजना वेळीप हांचें नांव निश्चीत करपा खातीर भाजपा कार्यालयांत बसका घेतली. ह्या वेळार सरचिटणीस दामू नायक आनी आदले खासदार विनय तेंडुलकार हाजीर आशिल्ले. भाजपा पक्षाच्या फुडाऱ्यांनी संजनाचें नांव निश्चीत करून तांकां परबीं दिलीं. ते उपरांत भाजपाचे वांगडी जिल्हो पंचायत कार्यालयांत आयले. पूण अध्यक्षाच्या नांवा खातीर चर्चेत आशिल्ली अनिता थोरात ताचे वांगडा नाशिल्ली. भाजपांत मागणी अशें कितें नासता. पक्षाचो निर्णय सगळ्यांक मान्य आसता अशें आदले अध्यक्ष सुवर्णा तेंडुलकार हांणी सांगलें. तशेंच भाजपा पक्षाचो निर्णय सगल्या कार्यकर्त्यां खातीर बंधनकारक आसता अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
