भांगरभूंय | प्रतिनिधी
पणजी, प्रतिनिधी : फुडल्या वर्सा सावन गोंयांत पिओपीचे एकाय मुर्तीक थारो दिवचे नात. ह्यो मूर्ती महाराष्ट्रांतल्यान गोंयात पावतात आनी त्यो शिमेचेर आडवपा खातीर चवथीचे चार म्हयने पयलींच तांचेर खर पाळत दवरतले, अशी म्हायती गोंय हस्तकला उदरगत महामंडळाचे अध्यक्ष प्रवीण आर्लेकार हांणी दिली.
गोंयचे गणपतीची मुर्ती करपी कलाकारांचे सबसिडींत वाड करपाची घोशणा आर्लेकार हांणी केली. ह्या वेळार महामंडळाचे वेवस्थापकी संचालक अजय गावडे आनी हेर अधिकारी तशेंच कलाकार हजर आशिल्ले.
फाटलीं 10-15 वर्सां जालीं मातयेची गणपतीची मुर्ती करपी कलाकारांक फकत दर मुर्ती फाटल्यान रु. 100 इतलें अनुदान मेळटालें. हांवें ह्या महामंडळाचो ताबो घेतले उपरांत कलाकारां बरोबर बसका घेवन तांच्यो समस्या जाणून घेतल्यो आनी रु. 100 वेल्यान हें अनुदान रु. 200 मेरेन व्हेलें, अशें आर्लेकार हांणी सांगलें.
रु. 200 हे अनुदान उणें आसा हाची जाणीव म्हाका आसा. पूण ही वाड खूब वर्सा उपरांत जाल्या हेंय महत्वाचें. फुडाराक हें अनुदान रु. 200 ते रु. 500 मेरेन करपा खातीर हो विशय विधानसभा अधिवेशनांत मांडटलों. गोंयांत प्लास्टर ऑफ पॅरिसाच्यो मूर्ती बंद जावच्यो आनी मातयेच्योच मूर्ती पुजेक लागच्यो म्हूण आमी हो उपक्रम हांतांत घेतला. माती मळपाक कलाकारांक मानाय हाडून तांकां हजार रुपयांचो दिसवडो दिवचो पडटा. देखून आमी गोंयभरच्या कलाकारांक 110 माती मळपाची माक्नां दिल्यांत. सद्या 422 कलाकारांनी अनुदाना खातीर अर्ज केल्यात. ते केन्नाय आपलीं कागदां सादर करून अनुदान व्हरपाक शकतात, अशें आर्लेकार हांणी सांगलें.
अंदूं आमकां उशीर जाला. पुण फुडल्या वर्सा सावन पिओपीच्या मुर्तींचेर खरसाण वाडयतले. चवथीचे चार म्हयने पयलीं ह्यो मूर्ती गोंयांत येतात आनी चवथी वेळार विकपाक काडटात. देखून फुडल्या वर्सा चार म्हयने पयलींच महाराष्ट्राच्या शिमेर आमी पाळत दवरपाक सुरू करतले, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
