भांगरभूंय | प्रतिनिधी
हिंदु जनजागृती समितीच्या प्रबोधना उपरांत चित्र बदल्लें
पर्वरी : ‘पिझा’ घरा मेरेन पावोवपी पर्वरेच्या ‘ला पिनोझ पिझा’ ह्या आस्थापनान श्रीगणेशाक ‘पिझ्झा डिलिव्हरी बॉय’च्या रूपांत दाखोवपी चित्र भायल्या हारशाचेर काडिल्लें. हे विशीं हिंदु जनजागृती समितीन केल्ल्या प्रबोधना उपरांत आस्थापनान तें देवाचीं फकांडां करपी चित्र पुसून थंय नवें चित्र काडलें.
चवथीचे फाटभूंयेर संबंदीत आस्थापनाच्या पर्वरेच्या दुकानाच्या प्रवेश दाराचेर श्री गणेशाचे ‘पिझ्झा डिलिव्हरी बॉय’च्या रूपांत चित्र काडिल्लें. ह्या चित्रांत पॅन्ट आनी शर्ट घाल्लो गणपती सायकलीचेर बशिल्लो दाखयिल्लो. ही गजाल लक्षांत आयले उपरांत हिंदु जनजागृती समितीच्या शिश्टमंडळान आस्थापनाची धनी कोमल सिंग हांची भेट घेतली. तिका संबंदीत चित्राक लागून श्रीगणेशाचीं फकांडां जाल्ल्याचीं आनी हे खातीर हिंदूंच्यो धर्मीक भावना दुखावल्ल्याचें दाखोवन दिलें. ह्या वेळार हिंदु शास्त्रा प्रमाण मूर्ती कशी आसची हाचीय म्हायती तांकां दिली.
नकळटां हें चित्र काडिल्ल्याचें कोमल सिंग हांणी सांगलें. ह्या वेळार हिंदु जनजागृती समितीच्या शिश्टमंडळांत दिलीप कुंभार, अरविंद कुमार, राज बोरकार आनी सुशांत दळवी हांचो आसपाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
