दक्षीण गोंय जिल्लो पंचायत अध्यक्षपदाचेर संजना वेळीप निश्चित

भांगरभूंय | प्रतिनिधी

मडगांव, प्रतिनिधी ः दक्षीण गोंय जिल्लो पंचायत अध्यक्ष पदा खातीर शुक्रारा संजना संजय वेळीप हांचो एकूच उमेदवारी अर्ज दाखल जालो. ते खातीर संजना वेळीप हांचे नांव अध्यक्ष पदा खातीर निश्चित जाला.
दक्षिण गोंय जिल्लो पंचायत अध्यक्ष पदा खातीर 2 सप्टेंबराक वेंचणूक जातली. हे खातीर शुक्रारा वेंचणुकेची प्रक्रिया सुरू जाली. गिर्दोळे जिल्लो पंचायत मतदारसंघाची वांगडी संजना संजय वेळीप हांणी शुक्रारा सकाळीं अर्ज भरपाच्या वेळार आपलो अर्ज सादर केलो. अर्ज भरपाच्या काळांत आनीक एकूय अर्ज आयलो ना. देखून संजना वेळीप हांची विरोधा विणे निवड जातली हें निश्चीत. वेंचणुकेचे पद्दती प्रमाण मतदानाची तारीख 2 सप्टेंबर आशिल्ल्यान तेच दिसा अधिकृत घोशणा जातली. दक्षीण गोंय जिल्लो पंचायतीचे मुखेल कार्यकारी अधिकारी गौरीश शंखवाळकार हे वेंचणुके खातीर वेंचणूक अधिकारी म्हूण वावुरले.
मजगतीं, दक्षीण गोंय जिल्लो पंचायतीचे अध्यक्ष पदा खातीर संजना वेळीप हांचे नांव निश्चित करपा खातीर भाजपा कार्यालयांत बसका घेतली. ह्या वेळार सरचिटणीस दामू नायक आनी आदले खासदार विनय तेंडूलकार हाजीर आशिल्ले. भाजपा पक्षाच्या फुडाऱ्यांनी संजनाचें नांव निश्चित करून तांकां परबीं दिली. ते उपरांत भाजपाचे वांगडी जिल्लो पंचायत कार्यालयांत आयले. पूण अध्यक्षाच्या नांवा खातीर चर्चेत आशिल्ली अनिता थोरात ताचे वांगडा नाशिल्ली. भाजपांत मागणी अशें कितें नासता. पक्षाचो निर्णय सगळ्यांक मान्य आसता अशें आदले अध्यक्ष सुवर्णा तेंडुलकार हांणी सांगलें. तशेंच भाजपा पक्षाचो निर्णय सगल्या कार्यकर्त्यां खातीर बंधनकारक आसता अशेंय तांणी स्पश्ट केलें.