भांगरभूंय | प्रतिनिधी
नगरसेवक प्रकाश भिवशेट : दक्षता खात्यान चवकशी करपाची मागणी
म्हापशें : म्हापशें नगरपालिकेचे मुळावे समितीन १५ लाख रूपयांचें इंधन बील प्रलंबीत दवरले उपरांत पालिकेच्या इंधन बिलांत अनियमितताय उक्तडार आयल्या. पालिके कडेन लाखांनी रुपयांचीं फटींगपणा जावपाचो भंय उक्तायला. हे विशीं दक्षता खात्या वरवीं चवकशी करची अशी मागणी नगरसेवक आनी थळावे समितीचे वांगडी प्रकाश भिवशेट हांणी केल्या.
म्हापशें पालिकेंत व्हडा प्रमाणांत भ्रश्टाचार चलता. इंधन आनी गाडयांचे दुरुस्तींत अर्थीक अफरातफर दिसून आयल्या. गॅरेजींत आशिल्ली गाडीय इंधन घालून चलोवपाची नोंद जाल्या. सरकारान हाची दखल घेवन दक्षता खातें वा सीआयडी वरवीं ह्या प्रकाराची चवकशी करची अशी मागणी तांणी केली.
म्हापशें पालिकेच्या हालींच जाल्ले थळावे समितीचे बसके मुखार फाटल्या चार म्हयन्यांचें सुमार १५ लाख रुपयांचें प्रलंबीत इंधन बिल मंजुरी खातीर दवरिल्लें. हाका लागून पेट्रोल पंप वाल्यांच्या खात्यांनी पयशे जमा करपाक मेळपाचे. मात, योग्य नोंदणे बगर हें प्रकरण थळावे समिती मुखार दवरिल्लें. आडकून उरिल्ल्या बिलांची रक्कम दिनाशिल्ल्यान पेट्रोल पंपच्या धनयांनी इंधन पुरवण बंद करपाची शिटकावणी दिल्ली. दरेके गाडये खातीर वापरपी इंधनाचे प्रक्रिये प्रमाण गाडी क्रमांक, पेट्रोल, डिझेल, वापरिल्ल्या इंधनाचें प्रमाण, इंधनाचें म्हयन्या प्रमाण दर हांची नोंदणी जाले उपरांत हें लेखापाल वा लेखाधिकार्यांनी प्रमाणीत करपाक जाय. उपरांत मुख्याधिकार्यांच्या मान्यतायेन तें प्रमाणीत करून थळावे समिती मुखार मंजुरी खातीर सादर करप गरजेचें. ही इंधना कडेन संबंदीत प्रक्रिया आसा. मात, ही पद्धत स्विकारूंक ना.
गाडयो म्हापश्या शारांतूच पासयो मारतात. मात दर दिसा दर गाडयेक शंभर लिटर पॅत्राॅल घालपाची नोंद आसा. ह्या पुराय प्रकाराक लागून थळावे समितीच्या वांगड्यांनी बिलांक मंजुरी दिवपाक न्हयकार दिला. प्रलंबीत रक्कम दिवपाक कळाव जाल्ल्यान पेट्रोल पंपच्या धनयान एक दीस इंधनाची पुरवण बंद केल्ली. मात पालिका अधिकार्यांचे मागणे उपरांत ही पुरवण आदले वरीं सुरू केली.
बिरेस्तारा पालिकेचे थळावे समितीची बसका जाली. दरेका वाहनाच्या इंधन बिलार हें कामकाज हाताळपी कर्मचारी, पालिका अभियंतो आनी मुख्याधिकारी हांची सय आसप गरजेचें, असो प्रस्ताव दवरलो. तशेंच ह्या फटींगपणाचो प्रकार पालिका मंडळाचे बसके मुखार हाडपाचो निर्णय ह्या वेळार घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
