भांगरभूंय | प्रतिनिधी
कोलन कॅन्सर हें गंभीर दुयेंस आंतकड्यांच्या व्हडल्या भागांत म्हळ्यार कोलनांत जाता. संवसारभर खास करून तरणाट्यां पिळगे मदीं ह्या कॅन्सराचो वाडपी आंकडो चिंतेचो आसा. बदलिल्ले जिणे पद्दतीक लागून आनी अनहेल्दी खावपाचे संवयेक लागून तरणाट्यां मदीं हो दुयेंस चड प्रमाणांत दिसून येता.
कोलन कॅन्सर म्हणल्यार कितें?
सगळ्यांत पयली कोलन कॅन्सर म्हणत्यार कितें तें समजून घेवप म्हत्वाचें. हो कॅन्सर कोलनांत वा व्हड आंतकड्यांच्या भितरल्या भागांत जाता. सुरवेक हें दुयेंस सामान्य गांठ म्हणून दिसता, उपरांत ताचें रुपांतर कॅन्सराचे गांठीत जावंक शकता. हे गांठीक लागून आंतकड्यांच्या कार्यात आडखळ येवंक शकता आनी कांय काळा उपरांत तो कुडीच्या हेर भागांनी वा हाडां मेरेन लेगीत पातळूंक शकता. हाका लागून कॅन्सराची लक्षणां बेगीन वळखून ताचेर योग्य उपचार करप गरजेचें आसा. कोलन कॅन्सराचीं लक्षणां म्हळ्यार पोटांत दुखप, आंतकड्यांनी बदल जावप, थकवा येवप, दुबळेपण येवप आनी अचकीत वजन उणें जावप.
कोलन कॅन्सर जावपाचीं कारणां…
कोलन कॅन्सराचीं वेगवेगळीं कारणां आसात. ताजीं फळां, भाजीपालो आनी फायबर आशिल्लीं खाणां आहारांत आस्पावनात, तांबडें मांस, प्रक्रिया केल्लें अन्न चड सेवन केल्यार हो कॅन्सर जावपाचो धोको वाडटा. कुटुंबांत ह्या कॅन्सराची लागण आसल्यार हें दुयेंस जावपाची शक्यताय चड आसता. मोटसाण, वजन चड आसप, नेमान व्यायाम करपाचो उणाव आनी ताण दिवपी जिणे पद्दत हाका लागूनय कोलन कॅन्सराचो धोको वाडूंक शकता. तशेंच तंबाखू आनी सोरो पियेवप हाकाय लागून कोलन कॅन्सर जावपाचो धोको आसा.
कोलन कॅन्सराचीं लक्षणां…
० कोलन कॅन्सर हो एक सायलेंट किलर आसून ताची लक्षणां सुरवातीक दिसनात. हो कॅन्सर जसो जसो वाडत वता तशीं तशीं ताचीं लक्षणां दिसपाक लागता.
० कोलन कॅन्सर आसल्यार हागवण आनी कोठ्याची पिडा (बद्धकोश्ठ) जाता. कितेंय खाल्यार ताचे अपचन जावप अशें त्रास जातात.
० कारण नासतना अचकीत वजन उणें जावप आनी विसव घेवन लेगीत थकपाक जावप हीं सामान्य लक्षणां, तांचे कडेन दुर्लक्ष करचें न्हय.
० हो कॅन्सर आशिल्ल्या लोकांक पोटांत दुखप वा दुबळेपण येवप, पोट फुगप अशें त्रास जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
