भांगरभूंय | प्रतिनिधी
येजमान इंग्लंड आनी श्रीलंका ह्या पंगडां मदीं लॉर्ड्स मैदानाचेर दुसरी टॅस्ट चालू आसा. जो रुटान आनीक एक शेंकडो मारून इंग्लंडाक बरे स्थितींत हाडलो. 2 बाद 42 अशी धांवसंख्या आसतना जो रूट मैदानांत देंवलो आनी ताणें मैदान गाजयलें.
ओपनर बेन डकेट 40 धांवड्यो करून बाद जालो. हॅरी ब्रुक्स (33) आनी जॅमी स्मिथ (21) हांणी रुटाक बरी साथ दिली. रुटान पंगडाक 7 बाद 358 मेरेन पावयलो. ताणें 206 बॉलांनी 18 चवक्यांचे मजतीन 143 धांवड्यो केल्यो.
हे खेळीन रुटान इंग्लंडा वतीन टॅस्टींत सगल्यांत चड धांवड्यो करपी बॅट्समन थारलो. रुटान 6577 धांवड्यो करतना अॅलिस्टर कुकाक (6568) फाटीं घालो. ते उपरांत ग्रॅहम गूच (5117), मायक अॅथर्टन (4716) आनी एलेक स्टिवर्ट (4650) हांचो क्रम लागता.
आंतरराष्ट्रीय क्रिकेटींत सगल्यांत चड शेंकडे मारपाचे वळेरेंत वारिट कोहली उपरांत रुटाचो (49) क्रमांक येता. ताणें रोहीत शर्माक (48) फाटीं घालो.
रुटान 145वे टॅस्टींत 33वो शेंकडो नोंदयलो. ताणें राहुल द्रविड (154) आनी अॅलिस्टर कूक (161) हांकां फाटीं घाले. रिकी पॉण्टिंग (107) आनी युनीस खान (109) वळेरेन पयले आनी दुसरे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
