भांगरभूंय | प्रतिनिधी
-कॉंग्रेसीचो उमेदवार ना: भाजपाचो उमेदवार विरोधाविणें येवपाची शक्यतायमडगांव : दक्षीण गोंय जिल्हो पंचायतीच्या अध्यक्षपदा खातीरची मतदान प्रक्रिया 2 सप्टेंबराक सकाळीं साडे 10 वरांचेर जातली. हाका लागून अर्ज सादरीकरण आनी छाननी प्रक्रिया 30 सप्टेंबराक सकाळ सावन जिल्लो पंचायत कार्यालयांत जातली. ही प्रक्रिया वेंचणूक अधिकारी तशेंच दक्षीण गोंय जिल्हो पंचायत मुखेल कार्यकारी अधिकारी गौरीश शंखवाळकार हांचे हाजेरींत जातली. मजगतीं अजूनय भाजपाच्या जिल्हो पंचायत वांगड्यांक कोणा कडल्यान अर्ज सादर करतले हाची म्हायती दिवंक ना.
30 ऑगस्टाक सकाळीं 10 ते 11.45 वरां मेरेन दक्षीण गोंय जिल्लो पंचायत मुखेल कार्यकारी अधिकार्यांच्या केबिनांत अर्ज भरप आनी अर्ज सादर करपाचो वेळ. उपरांत 12 वरांचेर अध्यक्ष पदा खातीर आयिल्ल्या अर्जांची वळेरी तकट्याचेर लायतले. 12.15 ते 12.30 वरां मेरेन अर्जांची छाननी जातली. उपरांत 12.45 वरांचेर छाननी उपरांत वैध थारिल्ल्या अर्जांची म्हायती जाहीर करतले. अडेज ते साडे तीन ह्या वेळार अर्ज फाटीं घेवपाची मुजत आसतली. उपरांत 30 ऑगस्टाक सांजेवेळार 4 वरांचेर वेंचणूक प्रक्रियेंत वांटेकार जाल्ल्या उमेदवारांची निमाणी वळेरी जाहीर करतले. उपरांत 2 सप्टेंबराक सकाळीं 10.30 वरांचेर मतदान जातलें आनी 11 वरांचेर मतमेजणी करून अध्यक्ष पदार जैतिवंत उमेदवार जाहीर करतले.
मजगतीं, दक्षीण गोंय जिल्लो पंचायत अध्यक्षपदा वेल्यान सुवर्णा तेंडुलकार हांणी पक्षाच्या आदेशा प्रमाण राजिनामो दिला. सध्या उपाध्यक्षां कडेन अध्यक्षपदाचो ताबो आसा. संजना वेळीप आनी अनिता थोरात हांचीं नांवां भाजपा कडल्यान चर्चेंत जरी आसलीं तरी अजूनय भाजपच्या जि. पं. वांगड्यांक उमेदवारी मेळटली हाची म्हायती दिवंक ना.
——————
काँग्रेसी कडल्यान उमेदवार ना
दक्षीण गोंय जिल्लो पंचायत वांगडी मिशेल रिबेलो हांकां विचारलें तेन्ना काँग्रेस वतीन सध्या तरी दक्षीण गोंय जिल्लो पंचायत वेंचणूक लडपा विशीं कांयच निर्णय घेवंक ना. भाजपा कडेन भोवमत आशिल्ल्यान वेंचणूक लडपाचो कांयच अर्थ ना अशें मत तिणें उक्तायलें. हाका लागून भाजपाचो उमेदवार वेंचणुके बगर विरोधा विणें वेंचून येवपाची शक्यताय वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
