भांगरभूंय | प्रतिनिधी
मुख्यमंत्री : 4 विद्यार्थी आशिल्यो शाळा लेगीत चालू दवरपाचे यत्न
भांगरभूंय । प्रतिनिधी
पणजी : सरकारी शाळांचे कुशीक खाजगी शाळा सुरू जाल्ल्यान सरकारी मुळाव्यो शाळा बंद पडटात, अशें मुख्यमंत्री डॉ. प्रमोद सावंत हांणी स्पश्ट केलां. सरकारी शाळांनी फक्त 4 विद्यार्थी आसले तरी त्यो शाळा चालू दवरपाचे यत्न आसात. ज्या शाळांनी विद्यार्थीच ना, त्यो शाळा बंद केल्यात, अशें तांणी सांगलें.
विद्यार्थीच नाशिल्ल्यान अंदूं गोंयांतल्यो 7 सरकारी शाळा बंद पडल्यात. सरकारी शाळांतले विद्यार्थी उणें जायत आसात. हाका लागून दर वर्सा कांय शाळा बंद पडटात. फाटल्या 10 वर्सांत गोंयांतल्यो 135 सरकारी शाळा बंद पडल्यात. 2014- 15 त गोंयांत 822 सरकारी मुळाव्यो शाळा आशिल्यो. आतां 687 मुळाव्यो शाळा उरल्यात. खाजगी शाळांनी विद्यार्थ्यांक आकर्शीत करपा खातीर तरेकवार येवजण्यो सुरू करतात. हाचो परिणाम सरकारी शाळांचेर जाता. खूब उणे विद्यार्थी आशिल्यो शाळा लागसारच्या शाळां मदीं विलीन करपाचो निर्णय कांय वर्सां पयलीं सरकारान घेतिल्लो. लागसारच्या शाळांचें विलीनीकरण जाले उपरांत लेगीत शाळा बंद पडप चालूच आसा. फाटल्या चार वर्सांचो विचार केलो जाल्यार दर वर्सां कांय शाळा बंद पडत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
