भांगरभूंय | प्रतिनिधी
फोंडें, प्रतिनिधी: मेस्तवाडो-भोमा १५ ऑगस्टाक गाडी आनी दुचाकी मदीं जाल्ल्या अपघात प्रकरणांत म्हाड्डोळ पुलिसांनी गाडी चालक रमेश सूर्यकांत मडकयकार (५०, वारखंडे- फोंडें) हाचे आड बुधवारा रातीं गुन्यांव नोंद केलो. ह्या अपघातांत स्कुटरी फाटल्यान बशिल्ली अमिता कांबळी (५८, तिसवाडी) ही बायल जखमी जाल्ली. निरीक्षक योगेश सावंत हांच्या मार्गदर्शना खाला हवालदार कृष्णनाथ नावेलकार हांणी अपघाताचो पंचनामो केल्लो.
मेळिल्ले चड म्हायती प्रमाण, १५ ऑगस्टाक सांजे वेळार सुमार ५.४० वरांचेर दुचाकी आनी गाडी हांचे मदीं अपघात जाल्लो. तेन्ना स्कुटर चालक अनिल कांबळी हो जखमी जाल्लो. जाल्यार फाटल्यान बशिल्ली ताची घरकान्न अमिता कांबळी ही गंभीर जखमी जाल्ली. जखमी बायलेचेर गोमॅकोंत उपचार चलतात. बुधवारा रातीं पुलिसांनी गाडी चालका आड गुन्यांव नोंद केलो.
मजगतीं, बिरेस्तारा सकाळीं संजीवनी साखर कारखान्या मुखारच्या रस्त्यार दुचाकी आनी गाडये मदीं जाल्ल्या अपघातांत पुनाजी दत्ता आगलोतकार (५०, साकोड्ड्यां) हो जखमी जालो. जखमीचेर पिळयें मुळाव्या भलायकी केंद्रांत उपचार केले. फोंडें पुलिसांनी अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
