भांगरभूंय | प्रतिनिधी
कायदो करपाक केंद्राचेरुय हाडटले चेंपण
कोलकाता, खबरां संस्था : बलात्कार प्रकरणांत आमचें सरकार शुन्य सहनशिलतेचें आसा अशें सांगून अस्तंत बंगालाची मुख्यमंत्री ममता बॅनर्जी हांणी, गुन्यांवकारांक फांशीची ख्यास्त निश्चीत करपा खातीर आतांच्या कायद्यांत फुडल्या सप्तकांत विधानसभेंत दुरुस्ती करतले.
दुरुस्ती विधेयक मान्य करपाक राज्यपालाक कळाव जाल्यार वा राष्ट्रपती कडेन संमती खातीर धाडल्यार राजभवना भायर धरणें धरतले अशें बॅनर्जी हांणी सांगलें. बलात्कार करप्यांक फांशीची ख्यास्त दिवपाचो कायदो करपाक केंद्राचेर चेंपण हाडपा खातीर तृणमूल कॉंग्रेस शेनवारा सावन राज्यांत सगळे कडल्यान आंदोलन सुरू करतली अशेंय मुख्यमंत्र्यांनी सांगलें.
फुडल्या सप्तकांत विधीमंडळाच्या खाशेल्या अधिवेशनांत आमी दुरुस्तीचें विधेयक संमत करतले अशें तिणें सांगलें. उपरांत आमी तें राज्यपालांक तांचे मान्यताये खातीर धाडटले. तांणी विधेयक मंजूर करपाक कळाव केलो जाल्यार आमी राजभवना भायर निशेध करतले अशें बॅनर्जी हांणी तृणमूल कॉंग्रेस छात्र परिषदेचे स्थापणुके दिसा आयोजीत केल्ले बसकेंत सांगलें. फाटल्या २० दिसां सावन कनिश्ट दोतोरांनी संप सुरू केला आनी ह्या दोतोरांनी परतून ड्युटीचेर येवपाचो विचार करचो असोय उलो तिणें मारलो.
नवे विधेयक हाडपाच्या प्रस्तावाक मान्यताय
अस्तंत बंगालच्या मंत्रिमंडळान बुधवारा बलात्कार आडावपा खातीर आनी अश्या गुन्यांवांक खर ख्यास्त निश्चीत करपाच्या हेतान नवें विधेयक हाडपाच्या प्रस्तावाक मंजुरी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
