भांगरभूंय | प्रतिनिधी
सांखळे मतदारसंघांत भाजप वांगडीपद मोहिमेचो शुभारंभ
दिवचल: भारतीय जनता पार्टी हें एक कुटूंब. दरेकल्याच्या सुखा दुख्खांत वांटेकार जावपी कुटुंबांत वांगडीपद घेवपा खातीर तांच्या घरा वचून तांकां वांगडी करात. निमाण्या घटका मेरेन पावून तांकां भाजप परिवारांत आसपावन घेवप, सुविधायो दिवपाक भाजप कटिबद्ध आसा. दरेका घराची भरभराट होच भाजपचो नारो अशें मुख्यमंत्री डॉ. प्रमोद सावंत हांणी सांगलें.
सांखळे मतदारसंघांत आयोजीत भाजप कार्यकर्ता संमेलनांत मार्गदर्शन करतना मुख्यमंत्री उलयताले.
अंत्योदय तत्त्वा प्रमाण निमण्या घटका मेरेन उदरगत पावोवप हें आमचें ध्येय. दरेका घरांत भाजपचे वांगडी निर्माण जावचे खातीर यत्न करात. लोकां कडेन सेगीत संपर्कांत रावप हो भाजपाचो अजेंडा. विकसीत भारत, विकसीत गोंय हे खातीर सगळ्यांनी भाजपाच्या फाटल्यान ठामपणान उबें रावचें. आमी दरेकल्याची उदरगत करपाक बांदील आसात. ताका लागून सगळ्यांनी चडांत चड वांगडी करून भाजपाची शक्त आनी परिवार आनीक घटमूट करचो असो उलो मुख्यमंत्र्यान मारलो.
ह्या वेळार माचयेर सुलक्षणा सावंत, दयानंद कारबोटकार, गोपाळ सुर्लिकार, सुभाष मळीक, कालिदास गांवस, नगराध्यक्ष सिद्धी पोरोब, सगळे सरपंच, पंच, नगरसेवक, तशेंच कार्यकर्ते व्हडा संख्येन हाजीर आशिल्ले.
दरेका घरांत वचून, तांची विचारपूस करून, वांगड्यांक कुटुंबांत घेतना चडांत चड वांगडी कशे जातले हाचो विचार करचो. तशेंच तांकां भाजपाच्या कार्याची वळख करून दिवची आनी वांगडी करून घेवपाचो यत्न करचो. फाटले वेंचणुकेचे तुळेंत अंदूं चड कार्यकर्ते जोडपाचे नदरेन सगळे यत्न करात, अशें तांणी मुखार म्हणलें.
मंडळ अध्यक्ष गोपाळ सुर्लिकार हांणी येवकार दिवन सहकार्य करपाचो उलो मारलो. खुबश्या जाणांनी मार्गदर्शन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
